NAÝRYZBAI QAJY TAǴANULY IORDAN MÚFTIIMEN KEZDESTI (FOTO)
Qazaqstan musylmandary dinı basqarmasynyń tóraǵasy, Bas múftı Naýryzbaı qajy Taǵanuly Iordan múftıi Ahmed Ibrahım ál-Hasanatpen kezdesti.
Mártebeli múftı Ahmed Ibrahım ál-Hasanat Iordanııa Hashımıt Koroldigine jumys saparymen kelgen Dinı basqarma Tóraǵasyn jyly qabyldap, qonaqtarǵa qurmet kórsetti.
Óz sózinde Iordan múftıi eki el arasyndaǵy baılanystardyń oń bastalǵanyn atap ótip, tabysty bolatynyna senim bildirdi. Al Bas múftı óz kezeginde mártebeli múftıge izgi shaqyrtýy úshin ári meımandos nıetine shyn júrekten alǵys bildirip, dinı-rýhanı damý jolyndaǵy baılanystardyń ornaǵanyna qýanyshyn jetkizdi.
«Sizben kezdeskenime qýanyshtymyn. Árıne bul saparda biz kóp tájirıbe alamyz. Biz sizdermen pátýa berý, ásirese zamanaýı pátýa berýde yntymaqtastyq ornatýǵa daıynbyz. Árıne bul salada Sizderdiń kópjyldyq tájirıbelerińiz bizdi qyzyqtyrady. Aldaǵy ýaqytta dinı suraqtarǵa jaýap beretin QMDB Sharıǵat jáne pátýa bóliminiń mamandarymen birlesken ózara kezdesýler ári onlaın tájirıbe almasý ótkizýge de múmkindigimiz bar. Eki el arasyndaǵy dinı salada birlesken kóptegen jumys baǵyttary bar dep esepteımin. Osy sapardyń bir jemisi aradaǵy alshaqtyqqa qaramastan, haq dinimiz bizdi jaqyndastyrady.
Mártebeli múftı, osy sátti paıdalanyp shynaıy alǵysym men rızashylyǵymdy bildiremin jáne Alla Taǵaladan zor densaýlyq, tabys tileımin» dedi QMDB Tóraǵasy.
Kezdesýde taraptar eki el arasyndaǵy túrli salada áriptestik ornatý, memorandým qabyldaý jáne tájirıbe almasý tetikteri boıynsha sóılesti.
