Naýryzbaı qajy Taǵanuly Konıada bilim alyp jatqan shákirttermen júzdesti (FOTO)

QMDB Tóraǵasy, Bas múftı Naýryzbaı qajy Taǵanuly Túrkııa Respýblıkasyna sapary barysynda Konıa qalasynda túrli mamandyq boıynsha bilim alyp jatqan qazaqstandyq stýdenttermen kezdesti.

Eń aldymen Bas múftı árbirimen jeke tanysyp, rýhanı baǵyttaǵy nasıhatyn jetkizdi.

«Jastyq shaq – eń bir sáýleli sát. Bilim izdený, shetelde turý tartymdy kórinedi. Degenmen týǵan elden jyraqtap ketý de ońaı emes. Bilim izdený jolynda qıyndyqqa qaramaı, kúni-túni oqý arqyly ǵana belgili bir dárejege jetesizder. Eń bastysy alǵan bilimderińizdi týǵan eldiń damýyna, ata dinimizdiń órkendeý jolyna jumsaý násip bolsyn. Biz bıyl Ihsan ilimin nasıhattaýdy qolǵa aldyq. Onyń túbi tereńde jatyr. Sondyqtan shette júrgen Sizder ıhsan ilimine saı bir-birlerińizge qoldaý kórsetip, qamqor bolyńyzdar. Alla qalasa alǵan ilimderińizdi shákirt tárbıeleý jolynda, Islam dininiń nasıhaty jolynda taratýǵa tyrysaıyq», – dedi Bas múftı.

Sondaı-aq kezdesý barysynda naıb múftı, Sharıǵat jáne pátýa bóliminiń meńgerýshisi Sansyzbaı Qurbanuly otandy súıý, ultqa qyzmet, ata-anaǵa jaqsylyq týrasynda tushymdy taǵylymyn aıtsa, Apparat basshysy Ǵylymbek Jádigeruly árbir istegi yqylas, elge degen mahabbat, baýyrǵa qamqorlyq jaıynda nasıhatyn jetkizdi.

Rýhanı keshtiń sońy bilim alyp jatqan shákirtterdiń suraq qoıyp, pikir almasýmen aıaqtaldy. Sondaı-aq QMDB Tóraǵasy «Mýftııat baspasynan» jaryqqa shyqqan «Ihsan – rýhanı tárbıe ilimi» kitabyn shákirtterge syıǵa tartty.