Naýryzbaı qajy Taǵanuly Mońǵolııa múftıimen suhbattasty (FOTO)
Búgin elordada Qazaqstan musylmandary dinı basqarmasynyń tóraǵasy Naýryzbaı qajy Taǵanuly Mońǵolııa musylman uıymdary odaǵynyń tóraǵasy Batyrbek Hadyspen kezdesti.
«Shaqyrtýymyzdy qabyl alyp, konferentsııamyzǵa kelgenińiz úshin sizge aıryqsha alǵysymdy bildiremin. Erteń elordamyzda ótetin halyqaralyq konferentsııada sizdiń tarapyńyzdan aıtylar taǵylymdy sóz óskeleń urpaqty izgi oılarǵa jetelep, táýelsizdigimizdiń qadirin sezine túsýge úndeıdi dep senemin» dedi Naýryzbaı qajy Taǵanuly.
Batyrbek Hadys konferentsııaǵa shaqyrtý jibergen Bas múftıge alǵysyn bildirip, izgi nıetin jetkizip: «Qaı jerde júrsek te atamekende bolyp jatqan jaqsy jańalyqtarǵa qýanamyz. Atamekenge kelgen saıyn qýat alyp qaıtamyz. Bizge qoldaý kórsetip, qamqor bolyp kele jatqan sizge erekshe rızashylyq nıetimdi jetkizemin. Arqa súıer atamekenimiz ben qarashańyraǵymyz – Qazaqstan musylmandary dinı basqarmasynyń baryna shúkir aıtamyz» dedi.
Kezdesý barysynda qandasymyz Bas múftıdi Mońǵolııanyń memlekettik medalimen marapattap, izgi tilegin bildirdi.
Aıta ketsek, erteń Nur-Sultan qalasynda Qazaqstan musylmandary dinı basqarmasynyń uıymdastyrýymen el egemendiginiń 30 jyldyq mereıtoıyna oraı «Táýelsiz Qazaqstan jáne Islam qundylyqtary» taqyrybynda halyqaralyq ǵylymı-tájirıbelik konferentsııa ótedi.
