NAÝRYZBAI QAJY TAǴANULY STÝDENTTERGE NASIHAT AITTY (FOTO)

Búgin Qazaqstan musylmandary dinı basqarmasynyń tóraǵasy Naýryzbaı qajy Taǵanuly elordadaǵy Sáken Seıfýllın atyndaǵy Qazaq Agrotehnıkalyq zertteý ýnıversıtetiniń stýdentterimen kezdesti.

Bas múftı bilim jolyndaǵy shákirtterge nasıhat aıtyp, olardy oqýda ozat, qoǵamda úlgili jáne týǵan elimizge qyzmet etýge shaqyrdy.

«Alla Taǵala Quran Kárimdegi «Rum» súresiniń 54-aıatynda: «Alla senderdi áý basta tym álsiz etip jaratady. Keıin sol álsizdikten soń býyndaryńdy bekitip kúsh-qýat beredi. Sodan keıin kúsh-qýatyńdy kemitip, qaıtadan álsiz hám qart qylady», – dep aıtqan. Bul aıatta aıtylǵan قُوَّةً «kúsh-qýat» sózi – jastyq shaq, úlken jiger men qaırattyń kezeńi, adam ómiriniń ortasyn bildiredi. Jastyq shaq – adam ómiriniń izgilik jasaýǵa umtylýy tıis eń jaqsy kezeńi, sondyqtan da adam qııamet kúni búkil ómiri úshin, sonyń ishinde ásirese jastyq shaǵy úshin erekshe suralady.

Biz 2024 jyldy dinı qyzmet aıasynda «Islam jáne dástúr qundylyǵy» jyly dep jarııaladyq. Ata dinimizben bite qaınasqan, babalarymyzdan ǵasyrlar boıy amanat bolyp kele jatqan salt-dástúrimizdi dáripteý – basty muratymyz. Bul baǵyttaǵy bastamalarymyzǵa qoǵamnyń árbir múshesi qoldaý bildirip, ıgi istiń basy-qasynan tabyla alady. Solardyń qatarynda jastardyń da júrýi zańdylyq. «Jas kelse – iske, kári kelse – asqa» demekshi, qaı iste bolmasyn jastardyń úlesi zor. Olar kóptigimen emes, táýekelshildigi, tabandylyǵy jáne qaısarlyǵymen myqty. Tarıhtyń qaısybir qatparyna kóz tastasańyz da, jastardyń qatysýynsyz is bitpegen.

Quran Kárimdegi «Káhf» súresinde ımanyn saqtap, úńgirge jasyrynǵan jastardyń oqıǵasy baıandalady. Osy súrede: «Olar Rabbylaryna ıman keltirgen jastar edi», – dep sıpattalady. Al adamzattyń asyly, ardaqty Paıǵambarymyz Muhammed (oǵan Allanyń salaýaty men sálemi bolsyn): «Jastardyń eń abzaly úlkenderge uqsaǵandary, sondaı-aq úlkenderdiń eń jamany (ǵapyldyqqa salynyp) jastarǵa uqsaǵandary», – dep aıtqan. Bul hadıstegi úlkenderge uqsaý degendi syrt kelbetin uqsatýmen shatastyryp almaý kerek. Ardaqty Paıǵambarymyz bul ósıeti arqyly jastardy jaman ádetterden tyıyp, danalyqqa shaqyrǵan» dedi Naýryzbaı qajy Taǵanuly.

Erkin formatta ótken taǵylymdy kezdesý sońynda stýdentter Bas múftıge ózderin tolǵandyrǵan suraqtaryn qoıyp, tushymdy jaýap aldy.

​