«Nur Astana» meshiti Máýlit merekesin atap ótti (FOTO)
Múbárak meıramdy atap ótýdi jyl saıyn nazardan tys qaldyrmaıtyn elordadaǵy «Nur Astana» meshiti búgin Máýlit keshin uıymdastyrdy.
Meshittiń bas ımamy Nurlan Ramazanovtyń ıgi bastamasymen ótken sharaǵa zııaly qaýym ókilderi, abyz, aqsaqaldar men aq jaýlyqty ájeler jáne jastardan quralǵan meshit jamaǵaty qatysty.
Saýapqa toly izgi sharada Muhammed paıǵambardyń (oǵan Allanyń salaýaty men sálemi bolsyn) sırasynan (ómirbaıany) syr shertken Máýlit jyry oqylyp, jıylǵan jamaǵat Alla Elshisine (oǵan Allanyń salaýaty men sálemi bolsyn) salaýat, sálem joldady. Adamzattyń ardaqtysy Paıǵambarymyz Muhammedtiń (oǵan Allanyń salaýaty men sálemi bolsyn) dúnıege kelgen kúniniń qurmetine ótken rýhanı keshte jamaǵat arnaıy jaıylǵan aq dastarhannan dám tatty.
Rýhanı keshtiń ótýine atsalysqan «Saýap» belsendiler toby da ádettegideı jomarttyq tanytyp, saýapty sharada boı kórsetti.
Alla elshisine salaýat joldap, qarııalarǵa qurmet kórsetip batasyn alǵan meshit ujymyna kelgen qonaqtar dán rızashylyǵyn bildirdi.
