«Nur Astana» meshitine bas ımam taǵaıyndaldy (FOTO)
Astana qalasyndaǵy «Nur Astana» meshitine jańa Bas ımam taǵaıyndaldy, dep habarlaıdy ummet.kz tilshisi. QMDB tóraǵasy, Bas múftı Serikbaı qajy Orazdyń buıryǵymen bas ımam qyzmetine osyǵan deıin «Sádýaqas qajy Ǵylmanı» meshitiniń Bas ımamy qyzmetin atqarǵan Nurlan Ramazanov taǵaıyndaldy.
QMDB-nyń Nasıhat jáne qoǵammen baılanys bóliminiń basshysy Altynbek Utyshan qasıetti juma namazyna jıylǵan jurtshylyqpen júzdesip, jamaǵatty jańa Bas ımammen tanystyrdy.
Buǵan deıin «Nur Astana» meshitiniń bas ımamy qyzmetin abyroımen atqarǵan Asqar Muqanov basqa qyzmetke aýysty.
Bas múftıdiń buıryǵyn oqyp bergen Altynbek Utyshanuly Nurlan ımamdy jańa qyzmetimen quttyqtaı otyryp, aldaǵy jumystaryna sáttilik tiledi. Jańa jaýapty qyzmetke aýysyp bara jatqan Asqar ımamǵa jamaǵattyń atynan rahmet aıtyp, alǵys bildirdi.
Ramazanov Nurlan Bekbolatuly
Nurlan Bekbolatuly 2003-2005 jyldary Almaty qalasy «Taıba» qazaq-arab kolledjinde, 2005-2009 jyldary «Nur Múbárak» Egıpet Islam mádenıeti ýnıversıtetiniń «Islamtaný» fakýltetin oqyp, támámdaǵan.
Sırııa-arab respýblıkasynyń Damask qalasyndaǵy «Fathýl Islam» ınstıtýtynda, Egıpet-arab respýblıkasynyń astanasy Kaır qalasyndaǵy «Ál-Azhar» ýnıversıtetine qarasty ımamdardyń bilimin jetildirý kýrsynda, Kaırdaǵy «Nıl» arab tili ortalyǵynda, Aleksandrııa qalasyndaǵy Ýaqf jáne Islam isteri mınıstrligine qarasty «Ábý Bákir Syddyq» ortalyǵynda dinı bilimin jetildirgen.
2009-2011 jyldary Atyraý oblystyq «Imanǵalı» ortalyq meshitiniń naıb ımamy, 2011-2013 jyldary Atyraý oblysy, Qurmanǵazy aýdandyq «Temiráli» meshitiniń bas ımamy, 2013-2014 jyldary Atyraý oblystyq «Imanǵalı» ortalyq meshitiniń naıb ımamy, 2014-2017 jyldary «Nur Astana» ortalyq meshitiniń naıb ımamy, 2017-2019 jyldary Respýblıkalyq «Áziret Sultan» meshitiniń naıb ımamy qyzmetterin abyroımen atqarǵan. Osy ýaqytqa deıin «Sadýaqas qajy Ǵylmanı» meshitiniń bas ımamy qyzmetin atqaryp keldi
Sondaı-aq, destrýktıvti dinı aǵym ókilderimen ıdeologııalyq túsindirme jumystaryn júrgizý tásilderi jáne dinı ortada memlekettik saıasatty qalyptastyrý boıynsha kóptegen semınarlar men bilim jetildirý kýrstaryna qatysqan jáne arnaýly maqtaý qaǵazdarymen marapattalǵan.
2014-2019 jyldary QMDB-nyń Elordadaǵy ókildiginiń jat aǵymmen jumys júrgizý baǵytynda úılestirýshi ımam jáne JANT múshesi boldy. Qazirgi tańda QMDB-nyń RANT múshesi. Destrýktıvti jat aǵym ókilderine arnalǵan «Át-Táýıl: oǵan qatysty ahlý súnnettiń ustanymy» atty ádistemelik quraldyń avtory, «Kálılla ýa dınna» kitabyn qazaq tiline aýdarýshylar tobynyń múshesi.
Elorda ákimderi Á. Isekeshevtyń jáne B. Sultanovtardyń arnaıy alǵys hatymen marapattalǵan.
