«Nur-Múbarak» ýnıversıteti men «Asyl Arna» telearnasy arasynda yntymaqtastyq memorandýmy qabyldandy (FOTO)
«Birlik bar jerde – tirlik bar» demekshi, «Nur-Múbarak» ýnıversıteti men «Asyl arna» telearnasy arasynda yntymaqtastyq memorandýmy qabyldandy. Bul tarıhı sát júzege asar aldynda «Asyl arna» telearnasynyń Bas dırektory, Qazaqstannyń eńbek sińirgen qaıratkeri Muhamedjan Tazabekovty «Nur-Múbarak» ýnıversıtetiniń rektory professor Mýhammad ash-Shahhat ál-Jındı qabyldady. Eki jaqty kelisimniń elimizdegi ımandylyqtyń, sanaly urpaqtyń tárbıesinde mańyzy zor ekendigi aıtylyp, bolashaq josparlarǵa sholý jasaldy.
Rektor, professor Mýhammad ash-Shahhat ál-Jındı:
«Asyl arna telearnasy jaıly bilip jatyrmyn, qazaq elinde dinimizdi, ımandylyq pen adamgershilik qundylyqtaryn nasıhattaıtyn telearnanyń bolýy óte keremet. Sebebi qazir tehnologııanyń zamany, adamdar kóbine ǵalamtor, TV arqyly aqparat alady. Al jaqsy, paıdaly aqparat taratý – bul úlken eńbek», - dedi.
Al, úsh mıllıondaı turaqty kórermeni bar telearna basshysy Muhamedjan Tazabekov:
«Bul rýhanı saladaǵy úlken oqıǵa. Óıtkeni «Asyl arna» Efırinen shyǵatyn habarlarda suhbat beretinder negizinen osy Nur-Múbarak ýnıversıtetiniń túlekteri. Elimizge belgili Qaırat Qurmanbaevtaı úlken ǵalymnyń kelýimen jańa ózgeristerge jol ashyp, áriptestik baılanys memorandým arqyly júıelenýda. Yntymaqtastyǵymyz ýnıversıtetke jańa basshylyq kelýimen jańa beleske kóterilip jatyr», - dedi.
Kezdesýge syıymen kelgen «Asyl arna» tól týyndysy, Buharı hadısine negizdelip, zamanaýı úlgide túsirilgen «Shatqal» fılmin usyndy. Týyndyny kórermender tapjylmaı otyryp tamashalap, rızashylyqtaryn jaýdyrdy.
