Nur-Múbarak ýnıversıtetinen 300 túlek túlep ushty (FOTO)
Qasıetti Quran men Qazaqstan jáne Mysyr elderiniń ánurandary oryndalatyn stýdenttik shaqtaǵy jıyndardyń sońǵysy búgin Nur-Múbarak ýnıversıtetiniń bıylǵy túlekterine arnaldy.
Qoshtasý saltanatynda ýnıversıtet basshylarynyń júrekjardy lebizderi túlekterdi tebirentti. Rektor, professor Mýhammad ásh-Shahhat: «Qurmetti túlekter, sizderdi shyn júrekten quttyqtap, aq jol tileımin. Ýnıversıtet rektory retinde ǵana emes, ákelerińiz retinde sóılep turmyn. Ýnıversıtetti bitirdi degen, bilim shyńyna shyqtym degen sóz emes, tek bilimnyń alǵashqy baspaldaǵyna kóterilip, kiltin ǵana ustadyńyzdar. Quranda «Rabbym, bilimimdi arttyr» degen aıat bar, sondyqtan bilim izdenýdi toqtatpaý kerek. Sizder Nur-Múbarak ýnıversıteti men onyń Túlekter qaýymdastyǵy bar ekenin umytpańyzdar», – dep túlekterge sáttilik tiledi.
Al prorektor, dotsent Qaırat Qurmanbaev: «4 jyl bilim aldyńyzdar, endi alda maman retinde elge, halyqqa qyzmet etý mindeti tur. Adamzat tarıhyn qarasańyz, ejelgi Mysyr, Grekııa, Rım bolsyn, jalpy kez kelgen órkenıet negizinde din jatyr. Din – rýhanııat ózegi. Sondyqtan sizder el aldyndaǵy jaýapkershilikpen qatar, Alla aldyndaǵy jaýapkershilikti túsingen túleksizder. Islam – abyroıly, kámil din. Ony qoǵamǵa kórsetetin biz. Qoǵam ıslamdy musylmandar arqyly kóredi. Al dinge qyzmet – abyroıly mindet. Sondyqtan sizdermen biz, bizben sizder maqtanatyndaı dárejede bolaıyq», – dep túlekterdi jigerlendire tústi.
Saltanatty kesh barysynda túlekter de ýnıversıtet ujymyna, ustazdaryna alǵystaryn jaýdyryp, osy oqý ornynyń artyqshylyǵyna toqtalyp, qýanyshyn bólisti. Án men jyrdan shashý shashylyp, ustazdar tarapynan qımastyq tilekter aıtyldy.
Aıta keteıik, bıyl Nur-Múbarak ýnıversıtetin bakalavrıat baǵdarlamasymen 300 túlek támamdady. Onyń 142-i – memlekettik bilim grantynyń ıegeri. Islamtaný boıynsha – 210 stýdent, dintaný boıynsha – 29, teologııa boıynsha – 45, Shetel tili: eki shet tili boıynsha 13 stýdent túlep ushpaq.
Saltanatty shara barysynda úzdik túlekter maqtaý qaǵazdarymen marapattalyp, ozyq túlekterdiń ata-analaryna alǵys hat berildi. Joǵary dárejede ótken saltanatty shara barysynda Nur-Múbarak ýnıversıteti túlekter qaýymdastyǵy ár túlekke kitaptan jasalǵan arnaıy estelik syılyqtar tabys etti.
