Nur-Sultan ókildigi boıynsha búgin 450 qoı soıyldy (FOTO+VIDEO)

Búgin qasıetti Qurban aıt meıramy bastalyp, ısi musylman jurtshylyǵy ulyq merekeni barynsha saýapty ótkizýge kirisip ketti. Ardaqty Paıǵambarymyz (s.ǵ.s.) aıtqandaı, musylman jamaǵatynyń aıt kúngi alǵashqy atqaratyn isi – namaz oqý, odan keıingi amaly qurbandyq shalý bolyp tabylady. Eldegi pandemııalyq jaǵdaıǵa baılanysty keı óńirlerde aıt namazy oqylmaǵanmen, qurbandyq shalý isi sanıtarlyq talaptarǵa sáıkes júrgizilý ústinde.

Qurban aıt merekesiniń alǵashqy kúni QMDB Nur-Sultan qalasy ókildigi boıynsha qurban shalý rásimi tańǵy saǵat segizden bastalyp ta ketti. Jergilikti ákimdik qoldaýy arqasynda qala boıynsha bıylǵy jyly tórt nysan QURBAN2021.KZ jobasy aıasynda jumys jasaýǵa jumyldyrylǵan bolatyn.

Qala bas ımamy Erbolat Júsipov bastaǵan ókildik qyzmetkerleri tórt nysan boıynsha qurban shalý rásimin atqaryp, QURBAN2021.KZ saıty arqyly tapsyrys bergen jandardyń amanatyn múltiksiz oryndaýǵa tyrysty. Árbir tapsyrys berýshiniń qurbandyǵyn soıý barysynan vıdeo esep ázirlenip, búgin birden ıelerine jóneltilip otyrdy.

Aıta keteıik, ókildik qyzmetkerleriniń uıytqy bolýymen aıt merekesiniń alǵashqy kúni Nur-Sultan qalasy boıynsha 450 qoı jáne 21 sıyr maly qurbandyqqa shalyndy. Qurbandyq etteri sol jerden birden bólshektelip, arnaıy paketterge bólinip, eriktiler arqyly muqtaj jandardyń mekenjaıyna jol tartty. Igilikti shara aıt merekesi boıy, ıaǵnı úsh kúnge sozylatyn bolmaq.

Sýretterdi «FOTOGALEREIa» aıdarynan kóre alasyzdar!