OTANDASTARYMYZ NEGIZGI QAJYLYQ RÁSIMDERIN ORYNDADY (FOTO)

Qasıetti Mekke qalasynda uly saparda júrgen otandastarymyz Islamdaǵy bes paryzynyń biri – qajylyqtyń negizgi rásimderin oryndady.

Qajylarymyz qulshylyqtaryn ıhram kıip, Mına jazyǵyna jınalýdan bastap, Arafatta kúni boıy duǵa etýmen jalǵastyrdy. Sóıtip Arapa kúni ardaqty Paıǵambarymyzdyń (oǵan Allanyń salaýaty men sálemi bolsyn) súnnetine saı Muzdalıfada túnedi. Al Qurban aıttyń birinshi kúni Jamaratta shaıtanǵa tas laqtyryp, odan keıin qurban shalyp, qasıetti Qaǵbaǵa taýap jasady. Sondaı-aq búgin Mınaǵa jınalǵan qazaqstandyq qajylar Jamaratta shaıtanǵa tas laqtyrý rásimin aıaqtaıdy.

Sondaı-aq sanaýly kúnderden keıin qajylarymyzdyń alǵashqy legi Djıdda qalasy arqyly elge orala bastaıdy. Qalǵan bóligi qasıetti Mádına qalasyndaǵy ardaqty Paıǵambarymyz Muhammedtiń (oǵan Allanyń salaýaty men sálemi bolsyn) meshitin zııarat etedi.

Aıta keteıik, Qazaqstan musylmandary dinı basqarmasy janynan qurylǵan Qajylyq mıssııasy uıymdastyrý-úılestirý, ýaǵyz-nasıhat, suraq-jaýap jáne pátýa berý, alǵashqy dárigerlik kómek, aqparat taratý baǵyttary boıynsha qajylarǵa qyzmet etýde. Mıssııa janynan ashylǵan alǵashqy medıtsınalyq kómek kórsetý ortalyǵy táýlik boıy jumys istep tur. Qajylarymyzdyń densaýlyǵy dárigerlerdiń baqylaýynda.

​