«Otbasy shyraǵynyń» qos jeńimpazyna ýmra qajylyǵyna joldama tabys etildi
Bıylǵy jyldy Bas múftı Serikbaı qajy Orazdyń «Islam jáne otbasy» jyly dep jarııalaǵan ıgi bastamasyna QMDB-nyń Almaty oblysy Almaty aımaǵy boıynsha ókildigi is júzinde qoldaý kórsetip, Respýblıka kóleminde «Otbasy shyraǵy» atty kelinder saıysyn ótkizdi. Almaty oblystyq «Qarasaı batyr» meshiti áıelder-qyzdar sektory bul sharanyń sharttaryn qasıetti Ramazan aıynyń sońynda áleýmettik jeliler arqyly jarııalaǵan bolatyn. Shart boıynsha 114 suraqqa durys jaýap bergen 8 úmitker aqtyq synda ózara baq synasty. Jeńimpazǵa bas demeýshi «QAZAQ TRAVEL» qajylyq kompanııasy ýmra qajylyǵyna joldama taǵaıyndaǵan bolatyn.
Shamalǵan mádenıet úıinde ótken báıge qorytyndysy 4 sharttan turdy: ózin-ózi tanystyrý, qasıetti Qurannyń «Hýjýrat» súresiniń kez kelgen jerinen oqylǵan aıatty jalǵastyryp, qazaqsha maǵynasymen aıtyp berý, Quran-Kárim men salt-dástúrden suraqtar, «Otbasy – baqyt mekenim» atty januıalyq tárbıedegi ustanymdarymen tanystyrý.
Júzden júırik, myńnan tulparlardy anyqtaý úshin qazylar alqasyna da bilikti mamandar tańdaldy: Almatydaǵy "Ǵalym» musylman qyzdar mektebiniń dırektory Aısha Ahmetova, «Qoıanqus» meshitiniń ustazy Minaıym Jumabekova, «Úshqońyr» medrese-kolledjiniń ustazy Ardagúl Baǵdal, qarı-ustaz Malıka Aıtjanqyzy, «QAZAQ TRAVEL» qajylyq kompanııasynyń ókili Danabıke Esenalıeva hanymdar ár qatysýshynyń bilimimen qatar ereksheligine de mán berip otyrdy. Báıgede «Otbasy – baqyt mekenim» atty otbasylyq tárbıe jaıly kelinder óz ustanymdarymen, tájirıbelerimen aldyn ala jasalǵan beınerolık arqyly bólisti.
Almaty, Túrkistan, Qaraǵandy, Jezqazǵan, Jambyl oblystarynan kelgen kelinderdiń ınabattylyǵy birinen biri ótedi. Nátıjesinde Almaty qalasynan kelgen ıbaly kelin Aqtilek Danabaeva ýmra qajylyǵynyń sertıfıkatyn jeńip aldy. Kóz jasyna erik bergen ımandy kelin saıys biter-bitpes telefonmen «Bul joldama – sizdiń jeńisińiz» dep enesin qýanyshqa bóledi. «Ekinshi anamdaı bolyp ketken enem osy saıysta jeńimpaz bolatyndyǵyma erekshe senip, batasyn berdi. Qasıetti Mekke, Mádınaǵa barý kópten bergi armany edi. Sondyqtan enemdi qýantý – men úshin úlken baqyt» dep aǵynan jaryldy. Al kelesi saıysker Zamıra Jýanysh óziniń ınabatty qylyǵymen kórermen bolyp kelgen Sánııa esimdi aq jaýlyqty ananyń júregin jaýlap alǵanǵa uqsaıdy. Nátıjesinde kásipker ana Zamıra kelinge ýmra qajylyǵyna óz atynan joldama usyndy. Qatysýshylardyń árqaısysy «Inabatty kelin», «Náziktik», «Ibaly» t.b. salıqaly kelinderge tán qasıettermen atalǵan arnaıy nomınatsııalarmen marapattaldy.
Qanshama jaýlyqtylardyń qýanyshyna sebep bolǵan bul «Otbasy shyraǵy» saıysyna demeýshilik jasaǵan úshin «QAZAQ TRAVEL» qajylyq kompanııasynyń dırektory Ashat Qabıdoldaulyna QMDB-nyń óńirlik ókili, «Qarasaı batyr» meshitiniń bas ımamy Qýanysh Narjanov alǵys bildirdi.
