Pavlodar oblysynan alǵashqy qarı shyqty (FOTO)
«Pavlodar oblysynyń óz týmasynan birinshi ret qarı shyqty.» Osylaı degen ókil ımamy Joldas Qospaquly meshit jamaǵatynyń aldynda Pavlodar qalasyndaǵy «Máshhúr Júsip Quran jattaý ortalyǵynyń» shákirti Manas Aıdarulyn tanystyrdy. Ókil ımam óz sózinde: «Jumalınov Manas – Pavlodar oblysynyń týmasy, ári osy oblystan shyqqan birinshi qarı boldy. Ol qasıetti Quran Kárimniń 114 súresin basynan-aıaǵyna deıin túgel jattady. Onysyn oblysymyzdaǵy bilikti ımamdardan quralǵan toptyń aldynda dáleldedi de. Bul bizdiń úlken maqtanyshymyz».
Ókil ımam ary qaraı óz sózinde:«Qarı dep Qurandy bastan aıaqjatqa biletin, tájýıd ǵylymyn jan-jaqty meńgergen, jeti qıraǵattyń máni men erekshelikterin, aıattardyń tafsıri (tápsiri, maǵynasy) men túsirilý tarıhyn, tolyq biletin adamdy aıtady. Manas baýyrymyz bul sharttyń barlyǵyn da aldaǵy ýaqytta tolyq meńgeredi dep oılaımyz. Óıtkeni basy jas, múmkindigi tolyq. Árıne, bul ońaı sharýa emes ekendigi belgili. Áıtse de «áreket bar jerde bereket bar» deıdi. Álemde Qurannan basqa tolyǵymen, árbir árpi ózgertilmesten, útir-núktesine deıin kókeıde saqtalatyn kitap joq. Muny dos ta, dushpan da biledi ári moıyndaıdy. Bul Alla Taǵalanyń musylmandar úshin bergen mártebesi, syıy»,-dep túsindirdi meshit jamaǵatyna.
Kelesi kezekte ókil ımam 22 jasar qarı Manasty jamaǵattyń aldyna ákesi Aıdarmen birge shyǵaryp, oblys musylmandary atynan alǵys aıta kele, úlken Quran kitabymen qosyp syı-sııapattar jasady.
Jas qarı Manas:
«Kóptegen baýyrlarymyz «Quran jattaý úshin qandaı keńes beresiz?» dep surap jatady. Men olarǵa bir ǵana negizgi keńesti beremin – Qurandy kóp oqý qajet. Qarılar Qurandy kóp oqyp, qaıtalaı berý arqyly qarı bolady. Quran jattaý – aıanbaı eńbektenýdi talap etetin mindet. Biz medresede oqyp júrgende ár kúni 10-12 saǵatymyz Quran oqýǵa arnaldy. Álıhan Bókeıhan atamyz: «Ultqa qyzmet etý – minezden» depti. Sondyqtan Quran sózin júrekte aqtyq demine deıtin saqtaý úshin, mahabbat tunǵan júrekpen qatar, aınymas minez de kerek. Sol úshin minezdiń kórkemdigi, júrektiń qajyr-qaıraty, aqyldyń saýyty da kerek dep oılaımyn»,-deıdi Pavlodarlyq jas qarı Aıdaruly Manas baýyrymyz.
Manas baýyrymyz aldaǵy ýaqytta Túrkııa eline baryp Qurandy ızajaǵa tapsyrýǵa daıyndalýda. Búgingi tańda «Máshhúr Júsip Quran jattaý ortalyǵynda» on shaqty shákirt bilim alýda. Ortalyqtyń baǵytyna sáıkes Quran, Quran tápsiri, tájýıd, aqıda, hadıs sekildi pánder oqytylady.
