Prezıdent qazaqstandyqtardy Oraza aıtpen quttyqtady
Qazaqstan Prezıdenti Qasym-Jomart Toqaev Qazaq elin kúlli musylman qaýymynyń qasıetti merekesi Oraza aıtpen quttyqtady. Memleket basshysynyń quttyqtaýy Aqordanyń resmı saıtynda jarııalandy.
«Sizderdi barsha musylman qaýymy úshin qasıetti Oraza aıt meıramymen shyn júrekten quttyqtaımyn! Otyz kúndik orazadan keıin keletin bul merekeni halqymyz qashanda erekshe sezimmen, zor qýanyshpen qarsy alady. Rýhanı tazarýǵa jáne kemeldenýge bastaıtyn Ramazan aıyn ulyqtap, bir-birine izgi tilekterin arnaıdy.
Oraza aıt ár musylmannyń júregine ımandylyq nuryn sebedi. Jurtty jaqsylyq jasaýǵa, qanaǵatshyl, qaıyrymdy jáne keshirimdi bolýǵa úndeıdi. Biz halqymyzdyń osyndaı biregeı qasıetteriniń arqasynda birligimizdi bekemdep kelemiz.
Islamnyń asyl qundylyqtary Jańa Qazaqstannyń da rýhanııatyn órkendetýge septigin tıgizeri sózsiz. Aıt qabyl bolsyn!» delingen Prezıdent quttyqtaýynda.
