Qadir túni – taǵdyr túni
Asa qamqor erekshe meıirimdi Allanyń atymen bastaımyn! Barlyq maqtaý Allaǵa tán. Ardaqty Paıǵambarymyz Muhammedke Allanyń salaýaty men sálemi bolsyn!
Qadirli jamaǵat!
Alla Taǵala túnderdiń ishinde Qadir túniniń qadiri men qasıetin arttyrdy. Ramazan aıynyń qasıetti bolýynyń uly erekshelikteriniń biri – Qadir túninde taǵdyrdyń jazylýy. Al Qadir túniniń qasıetti bolýynyń máni – adamzat balasyn eki dúnıe baqytyna jeteleýshi, aq pen qaranyń, adal men aramnyń arajigin aıqyndaýshy Qurannyń túsýi.
Aısha anamyz (oǵan Alla razy bolsyn): «Ramazannyń sońǵy on túni kirgen kezde Paıǵambar bilegin sybanyp, túnin qulshylyqpen tiriltken jáne otbasyn da qulshylyqqa oıatqan», – deıdi. Duǵalar qabyl bolatyn, kúnálar keshiriletin, taǵdyrlar jazylatyn, perishteler sálem joldaıtyn túndi erekshe qulshylyqpen ótkizgen abzal. Bul túnde namaz ben Quran oqýdyń saýaby mol. Sonymen qatar kóbirek duǵa jasaýdy umytpaıyq.
Aısha anamyz (oǵan Alla razy bolsyn) ardaqty Paıǵambarymyz Muhammedten (oǵan Allanyń salaýaty men sálemi bolsyn): «Ýa, Allanyń elshisi, Qadir túninde qandaı duǵa tileıin?» – dep suraıdy. Sonda Paıǵambarymyz (oǵan Allanyń salaýaty men sálemi bolsyn): «Alla, rasynda, Sen keshirimdisiń jáne keshirgendi jaqsy kóresiń. Meni keshire kór» dep aıtasyń», – dep jaýap bergen. Paıǵambarymyz (oǵan Allanyń salaýaty men sálemi bolsyn) taǵy bir hadısinde: «Kimde-kim Qadir túni ımanmen jáne saýabyn úmit etip qulshylyq etse, onyń aldyńǵy kúnálary keshiriledi», – degen.
Isi musylman balasynyń taǵdyr jazylatyn túndi taǵatsyzdana kútýiniń bir hıkmeti – Jaratqanǵa jaqyndaı túsýge talpynýy. Sondyqtan bul túndi saýapty istermen ótkizýge tyrysaıyq.
Alla Taǵala Quranda:«Biz shynynda, Qurandy Qadir túninde túsirdik. Qadir túniniń ne ekenin bilesiń be? Qadir túni (qasıet jáne saýap jaǵynan) myń aıdan da qaıyrly. Sol túnde perishtiler jáne Jábireıil Allanyń ámirimen (jer betine Alla taǵdyr etken) barlyq isterdi atqarý úshin túsedi. Sol bir tún, aǵaryp tań atqanǵa deıin amandyq-tynyshtyq túni bolady», («Qadir» súresi, 1-5-aıattar) – dep baıandaıdy. Biz bul aıattan qasıetti Quran Qadir keshinde túskenin bilemiz. Endeshe, osy keshte Quran aıattarynyń syryna úńilip, maǵynasyna oı júgirteıik.
Bul túnde Jaratqanǵa shynaıy jalbarynǵan pendelerdiń tilekteri qabyl etilip, taǵdyry jazylyp, rızyq-nesibesi bekitiledi. Alla Taǵala rızyq-nesibemizdi arttyryp, Qadir keshinde shynaıy ımanmen jasaǵan duǵalarymyzdy, namazdarymyzdy, bergen sadaqalarymyzdy, oqyǵan Quranymyzdy qabyl etip, saýabyn eselep jazǵaı. Jaratqan Jabbar Iemiz jer betinen juqpaly indetti joıyp, jaqsylyqta júzdesýdi násip etkeı. Ámın!
Naýryzbaı qajy TAǴANULY
Qazaqstan musylmandary dinı basqarmasynyń
tóraǵasy, Bas múftı
