Qadir túninde Bas meshitten tikeleı túsirilimder júrgizildi (FOTO+VIDEO)
Keshe kúlli álem musylmandary myń aıdan da qaıyrly Qadir túnin ótkizdi. Saýaby seksen úsh jylǵa tatıtyn teńdessiz túndi qur jiberip almaýǵa tyrysqan musylman úmmetiniń bul túngi duǵa-tilekteri, qulshylyq-ǵıbadattary, keshirim suraǵan sózderi men aıtqan salaýat-zikirleri tań atqansha tolastamady. Alla Taǵala barsha musylman úmmetiniń bul túngi amaldaryn qabyldyqqa jazǵaı!
Qazaqstan musylmandary dinı basqarmasy elimizdegi pandemııalyq jaǵdaıdy eskerip, qaýipti derttiń taralýyn aldyn alý úshin qasıetti Qadir túninde meshitte oryndalatyn dinı rásimder onlaın rejimde ótetinin málimdegen bolatyn. Halyqtyń densaýlyǵy men ómiri bárinen qymbat qundylyq bolǵandyqtan, keshe meshit ǵımarattary túgeldeı jabylǵan edi.
Osyǵan oraı, Qazaqstan musylmandary dinı basqarmasynyń uıymdastyrýymen Qazaqstan Ulttyq arnasy men QMDB-ǵa qarasty «Halyq arnasy» arqyly qasıetti Qadir túninde tikeleı túsirilimder júrgizildi. «Myń aıdan da qaıyrly Qadir túni» degen ataýmen kók Ekrannan kórermenge jol tartqan taǵylymdy habarlardy, sondaı-aq, meshit aýlasyna ornatylǵan Led Ekrandar arqyly jıylǵan jamaǵat ta tamashalap otyrdy. Jáne de QMDB-nyń áleýmettik jelilerdegi resmı paraqshalary – MÝFTIIaT QMDB youtube kanaly men muftiyatkz instagram kanaly arqyly kórsetildi.
Qazaqstan musylmandary dinı basqarmasynyń tóraǵasy, Bas múftı Naýryzbaı qajy Taǵanuly, Naıb múftı Ershat Aǵybaıuly men basqa da bólim meńgerýshileri birinen soń biri jalǵasqan qos telearnanyń tikeleı túsiriliminde Qadir túniniń qasıeti jaıynda, bul túngi qulshylyqtar haqynda, basqa da taqyryptar boıynsha taǵylymdy ýaǵyz aıtyp, kórermenge kóptegen paıdaly keńesterimen bólisti.
Sondaı-aq, baǵdarlama aıasynda qoǵam qaıratkerleri, zııaly qaýym ókilderi men el aǵalary da arnaıy suhbatqa shyǵyp, Qazaqstan halqyna óz quttyqtaý lebizderin bildirip otyrdy. Bul túni tikeleı Efır arqyly Bas múftı Naýryzbaı qajy Taǵanuly Quran hatym duǵasyn oqyp, el ıgligi men amandyǵyn tilep bata jasady.
Sýretterdi «FOTOGALEREIa» aıdarynan kóre alasyzdar!
