Qadir túnine qatysty QMDB málimdemesi

07 mamyr 2021 3673 0
Оqý rejımi

Qadirli jamaǵat!

Ózderińizge belgili, elimizdegi jáne álemdegi kóptegen qoǵamdyq is-sharalar men jıyndar onlaın rejımde ótýde. Onyń basty sebebi pandemııalyq jaǵdaıdy odan saıyn kúrdelendirmeý ekeni belgili. Óıtkeni, juqpaly dertpen oqshaýlaný arqyly ǵana kúresýdiń mańyzy kún saıyn artýda. Álemdik tájirıbede koronavırýspen kúresýdiń oqshaýlaný tásili oń nátıjesin berip jatqanyn jaqsy bilemiz.

Qazaqstan musylmandary dinı basqarmasy elimizdegi pandemııalyq jaǵdaıdy eskerip, qaýipti derttiń taralýyn aldyn alý úshin qasıetti Qadir túninde meshitte oryndalatyn dinı rásimder onlaın rejimde ótetinin habarlaıdy. Osy rette Qadir keshin úıde ótkizý qajettigin qaperlerińizge salamyz. Halyqtyń densaýlyǵy men ómiri bárinen qymbat qundylyq bolǵandyqtan, osyndaı ýaqytsha sheshimdi durys qabyldaýlaryńyzdy jáne tártipke baǵynýlaryńyzdy suraımyz. Ár adam óziniń otbasy men qoǵam aldyndaǵy azamattyq ári adamgershilik jaýapkershiligin tereń sezinip, juqpaly derttiń taralmaýyna úles qossa, Allanyń járdemimen bul synaqty da eńseremiz. Alla Taǵala «Baqara» súresiniń 195-aıatynda: «Ózderińdi óz qoldaryńmen qaýip-qaterge salmańdar», – dep buıyrǵan. Bul aıat barshamyzǵa ómirlik ǵıbrat bolýy tıis.

Qurmetti qaýym!

Qazaqstan musylmandary dinı basqarmasy qasıetti Qadir túninde otandyq telearnalar men «Halyq arna», «Hıkmet TV» jáne muftyat.kz saıtynyń áleýmettik jelidegi paraqshalarynda arnaıy onlaın baǵdarlama uıymdastyrady. «Qasıeti mol qadir túni» atty onlaın baǵdarlamada elimizge belgili ǵalymdardyń ýaǵyz-nasıhatyn tyńdap, Quran hatym duǵasyna qatysa alasyzdar. Dinı basqarma janyndaǵy aqparat berý ortalyǵynan (call center, 8 7172 33 30 30) táýlik boıy kókeıdegi saýalyńyzǵa jaýap alasyz.

Alla Taǵala saýaby myń aıdan artyq, túnderdiń tóresi, qasıetti Qadir keshinde úıde jasaǵan duǵa-tilekterimizdi, qulshylyq-ǵıbadattarymyzdy qabyl etip, meshitterimizde bir sapta turyp, namaz oqıtyn kúndi jaqyn etkeı. Jaratýshy Jabbar Iemizden jer betinen juqpaly indetti joıyp, qalypty kúnge oralyp, qýanyshty kúnderge jetkizýin tileımiz. Elimiz aman, jurtymyz tynysh bolǵaı. Ámın!

Pіkіrler Kіrý