Qala bas ımamy kóshe tazalyqshylaryna qurmet kórsetti

Memleket basshysy jarııalaǵan Jumysshy mamandyqtary jyly aıasynda jáne Qurban aıt merekesine oraı Astana qalasynyń jáne «Áziret Sultan» meshitiniń bas ımamy Nurbek qajy Áýeshanuly kóshe tazalyǵyn qamtamasyz etip júrgen eńbek adamdaryna azyq-túlik sebetterin tabystap, merekemen quttyqtady.

Is-shara barysynda bas ımam tazalyq qyzmetkerleriniń qoǵamdaǵy mańyzdy róline toqtalyp, olardyń kúndelikti adal eńbegi qala turǵyndarynyń jaıly ári taza ortada ómir súrýine úlken úles qosyp otyrǵanyn atap ótti. Sondaı-aq Qurban aıttyń meıirim men janashyrlyqqa úndeıtin ulyq mereke ekenin aıtyp, eńbek adamdaryna shynaıy rızashylyǵyn bildirdi.

«Qoǵamnyń tynys-tirshiliginde ár mamandyqtyń óz orny bar. Ásirese tańnyń atysynan keshtiń batysyna deıin qalanyń tazalyǵy úshin eńbek etip júrgen azamattardyń eńbegi qashanda qurmetke laıyq. Qurban aıt merekesi qarsańynda sizderge alǵysymyzdy bildirip, merekelik kóńil kúı syılaýdy jón kórdik», – dedi Nurbek qajy Áýeshanuly.

Qaıyrymdylyq sharasynyń joǵary deńgeıde uıymdastyrylýyna Qazaqstan musylmandary dinı basqarmasy janyndaǵy «Zeket jáne qaıyrymdylyq» qorynyń Astana qalasy boıynsha jaýapty mamany Nurbol Orazbaı uıytqy bolyp, uıymdastyrý jumystaryna belsendi atsalysty.

Is-shara sońynda Nurbek qajy Áýeshanuly eńbek adamdaryna aq batasyn berip, otbasylaryna amandyq, eńbekterine bereke, denderine saýlyq tiledi. Sondaı-aq elimizdiń tynyshtyǵy men halqymyzdyń birligi úshin duǵa jasady.

Источник: Aisha