Qala bas ımamy merekege oraı qarııalardyń úıin zııarat etti

Astana qalasynyń bas ımamy Nurbek qajy Áýeshanuly Qurban aıt merekesine oraı qarııalardyń shańyraǵyn zııarat etip, merekemen quttyqtap qaıtty.

Qazaqstan musylmandary dinı basqarmasynyń tóraǵasy, Bas múftı Naýryzbaı qajy Taǵanulynyń tapsyrmasyna sáıkes júzege asqan ıgi bastama aıasynda qala bas ımamy aıt merekesimen quttyqtady. Qarııalardyń hal-jaǵdaıyn surap, aq batasyn aldy. Qazaqy saltpen qurmet kórsetip, ıyqtaryna shapan japty.

Kezdesý barysynda úlkenderdiń ónegeli ómir joly, urpaq tárbıesi men el birligi jaıynda taǵylymdy áńgime órbip, aqsaqaldar jastarǵa aqyl-keńesterin aıtty.

Nurbek qajy Áýeshanuly Qurban aıttyń musylman jurtshylyǵyn meıirimge, baýyrmaldyqqa jáne ózara janashyrlyqqa úndeıtin ulyq mereke ekenin atap ótti. Sondaı-aq bul meıram adamdar arasyndaǵy syılastyqty arttyryp, aǵaıynnyń aralasýyn kóbeıtip, úlkenge qurmet pen kishige izet kórsetiletin rýhanı qundylyqtardy jańǵyrta túsetinin jetkizdi.

Aqsaqaldar óz kezeginde merekelik quttyqtaý men qurmetke rızashylyqtaryn bildirip, el amandyǵy men jurt tynyshtyǵy úshin aq tilekterin arnady.

Источник: Aisha