Qala bas ımamy olımpıada júldegerlerin marapattady

Astana qalasynyń bas ımamy Erbolat Júsipov elordadaǵy Astana medrese-kolledjine arnaıy baryp, bilim ordasynyń ujymymen jáne shákirtterimen kezdesti.

Kezdesý barysynda respýblıkalyq deńgeıdegi olımpıadada júldeli oryndarǵa ıe bolǵan medrese shákirtteri saltanatty túrde marapattaldy. Atap aıtqanda, bilim dodasynda joǵary nátıje kórsetken Sardar Abdýrasýluly men Nazym Qaıratqyzy I oryn ıelense, Nurmuhammed Aıýbaı men Aqmaral Ǵabıtqyzy III orynǵa laıyq dep tanyldy.

Óz kezeginde qala bas ımamy Erbolat Júsipov medrese dırektory Ońǵarbaev Qanat Qalymbetulyna bilim ordasyndaǵy júıeli jumys pen shákirt tárbıesine qosqan súbeli úlesi úshin rızashylyǵyn jetkizdi. Sonymen qatar, shákirtterdiń bilim men ǵylym jolyndaǵy jetistikterine úles qosqan ustazdar – Tamırlan Darhanuly, Jolnur Jaqsylyqqyzy, Aıbota Berikbolqyzy, Ádilet Ahmetulyna alǵys bildirilip, arnaıy marapattar tabystaldy.

Jıyn barysynda bas ımam bilim alýdyń mańyzdylyǵyna toqtalyp, dinı jáne zaıyrly ilimdi qatar meńgergen, elge qyzmet etetin bilikti mamandardy tárbıeleý – ýaqyt talaby ekenin atap ótti. Sondaı-aq, shákirtterge sáttilik tilep, aldaǵy ýaqytta da bıik belesterdi baǵyndyrýǵa shaqyrdy.

Kezdesý sońynda jınalǵan jamaǵatqa taǵylymdy nasıhat aıtylyp, el birligi men rýhanı damýǵa baǵyttalǵan izgi tilekter bildirildi.

Источник: Aisha