«Qamqor» ortalyǵyndaǵy emdelýshilerge erekshe syı jasaldy (FOTO)

Keshe Elorda irgesindegi Aqkól aýdanynda ornalasqan Nur-Sultan qalasy ákimdiginiń «Qamqor» áleýmettik qyzmet kórsetý ortalyǵyndaǵy emdelýshi jandarǵa erekshe syı jasaldy. Respýblıkalyq «Áziret Sultan» meshitiniń áıel jamaǵaty men Qazaqstan halqy Assambleıasy aıasyndaǵy «Analar keńesiniń» birlese uıymdastyrýymen naýqas jandarǵa arnaıy saıahat uıymdastyrylyp, Bas shahardyń aıtýly nysandarynda erekshe kezdesýler ótkizdi.

«Qamqor» ortalyǵyndaǵy 40 naýqasty qamtyǵan qaıyrymdylyq shara aıasynda Qýyrshaq teatrynyń ónerin tamashalap, áserli qoıylymǵa kýá boldy. Budan soń respýblıkalyq «Áziret Sultan» meshitin zııarat jasaǵan emdelýshilerge merekelik dastarhan jaıylyp, qulshylyq ordasymen tanystyrý jumystary júrgizildi. Qonaqtardy meshit bas ımamy Erbolat Júsipov ózi qarsy alyp, bul saıahattyń erekshe estelikterimen este qalýyna áser etti.

Merekelik dastarhan basynda qonaqtarǵa arnaıy syılyq sómkeleri úlestirilip, qýanysh ústine qýanysh syılaı tústi. Shara aıasynda «Analar keńesiniń» tóraıymy Altynaı Muratjanqyzy men «Áziret Sultan» meshitiniń áıel jamaǵatynyń uıytqysyndaı bolǵan Ánııash apa bastaǵan demeýshiler pen uıymdastyrýshy jandar da izgi tilekterin bildirdi. Kól-kósir qurmet pen meıirimge jaýap retinde ortalyq emdelýshiler ózderiniń qolmen salǵan sýretterin aǵa-ápkelerine syıǵa tartyp, meshit ishin meıirimge toltyra tústi.

Sýretterdi «FOTOGALEREIa» aıdarynan kóre alasyzdar!