Qapshaǵaı qalasynda «Abaı meshiti» ashyldy (FOTO)
Almaty oblysy Qapshaǵaı qalasyndaǵy jańadan boı kótergen 10 jáne 12-yqshamaýdandary turǵyndardyń ótinishi boıynsha 120 adamǵa shaqtalǵan shaǵyn meshit ashyldy. Meshit ǵımaratyn aýyl turǵyndary asarlatyp ózderi kóterdi.
Hákim Abaı atymen atalǵan jańa meshittiń ashylý saltanatyna «Qarasaı batyr» ortalyq meshitiniń bas ımamy Qýanysh Narjanov, Qapshaǵaı qalasynyń ákimi Nurlan Qumataev, Qapshaǵaı qalalyq maslıhat depýtaty Serikbaı Nurjanov, Qapshaǵaı qalasy ardagerler keńesiniń tóraǵasy Amangeldi Bespaev, qalamger-aqyn Altynshash Jaqııanova, Qapshaǵaı qalasy Aýǵan soǵysy ardagerleri odaǵynyń tóraǵasy Murat Kýteev, Qapshaǵaı qalalyq ortalyq meshitiniń bas ımamy Aldajar Seıituly jáne aýyl ımamdary men qala turǵyndary qatysty.
Jıyn jańa meshittiń ımamy Beısenbek Adembekulynyń qasıetti Quran Kárimdi tıláýat etýimen bastalyp, duǵa jasaldy. Almaty óńiriniń bas ımamy Qýanysh Baqytbekuly QMDB Tóraǵasy, Bas múftı Naýryzbaı qajy Taǵanulynyń quttyqtaý sálemin jınalǵan jamaǵatqa jetkize kelip: «Qazaq jerindegi taǵy bir meshittiń ashylýy qutty bolsyn! Búginde elimiz ósý, órkendeý, damý jolynda keledi. Munyń bári – táýelsizdiktiń arqasy. Islam dini qazaq memleketiniń ǵasyrlar boıǵy rýhanı tiregi men súıenishi bolyp keledi. Babalar amanatyn keler urpaqqa jetkizý – biz ben sizdiń eń mańyzdy mindetimiz. Elimiz aman, jurtymyz tynysh bolǵaı!» – dedi.
Al Qapshaǵaı qalasynyń ákimi Nurlan Orynbasaruly arnaıy quttyqtaý sóz sóılep, qulshylyq nysanynyń halyqtyń bereke-birligine qyzmet etetinine senim bildirdi. Abaıdyń 175 jyldyǵyna sáıkes meshittiń de hákimniń atymen atalǵanyna aqsaqaldarǵa rızashylyq bildirip, jastardy ımandylyqqa, eljandylyqqa tárbıeleýdiń zor mańyzy bar ekenine toqtaldy.
Birligi jarasqan Qapshaǵaı óńiri turǵyndary taǵy bir bereke qýanyshyna jıylyp, eldiń amandyǵy men tynyshtyǵy uly murat ekenin óskeleń urpaqqa osylaısha taǵy bir nasıhattady.
