Qazaqstan meshitteri Aıt merekesin qalaı atap ótti?
Bıyl elimiz Oraza aıt merekesin erekshe atap ótti. Erekshe deıtin sebebimiz – eki jyl pandemııaǵa baılanysty 2020 jyly aıt namazy oqylmasa, byltyr namaz oqylǵanymen, sanıtarlyq talaptardy saqtaý maqsatymen merekelik is-sharalar uıymdastyrylmaǵan edi.
Al, 2 mamyr kúni tańerteń Bas múftı Naýryzbaı qajy Taǵanuly bastaǵan Dinı basqarma ujymy jáne 19 ókildikke qarasty barlyq meshit ımamdary aıt merekesin joǵary deńgeıde atap ótýge atsalysty.
Malaızııada 30 kún toılansa, qazaq eli beıresmı túrde úsh kún atap ótetin Oraza aıt merekesin Qazaqstan meshitteri qalaı ótkizdi, qandaı merekelik is-sharalar ótti, qysqasha baıandap ótýdi jón sanap otyrmyz.
Ádettegideı mereke aıt namazyn oqýmen bastaldy. Bas múftı Naýryzbaı qajy Taǵanuly elordadaǵy respýblıkalyq «Áziret Sultan» meshitinde aıt namazyna ımamdyq jasasa, basqa meshitterde, ókildikterge qarasty qulshylyq oryndarynda bas ımamdar namaz ótkizip, qutba oqydy.
Nur-Sultan qalasynyń meshitterinde Oraza aıt merekelik is-sharalarǵa jalǵasty. Máselen respýblıkalyq «Áziret Sultan» meshitinde birqatar merekelik sharalar uıymdastyryldy. Qazaqy dástúrimizge saı aıtshylap kelgen qonaqtar úshin qos kıiz tigilip, meshit atynan merekelik dastarhan jaıyldy.
Arnaıy jaıylǵan aıt dastarqanynan QMDB tóraǵasy, Bas múftı Naýryzbaı qajy Taǵanuly, qala ákimi Altaı Seıdiruly bastaǵan qurmetti qonaqtar dám tatyp, izgi tilekterin bildirip shyqty. Bas múftı Naýryzbaı qajy Taǵanuly aıt merekesiniń qadir-qasıeti jaıly sóz qozǵap, aq jaýlyqty apa-ájelerimizge rııasyz alǵysyn bildirdi.
Aıta keteıik, meshit aýlasynda meıramǵa oraı Áıel-qyzdar sektory «Qaıyrymdylyq jármeńkesin» qosa uıymdastyryp, jamaǵatqa qoldan daıyndalǵan túrli taǵamdar men táttiler usyndy.
Sondaı-aq sport saıystary uıymdastyrylyp, ulttyq oıyndar ulyqtaldy. Odan bólek «Ábý Nasyr ál-Farabı» meshitinde Oraza aıt merekesi aıasynda «Meıirimdilik jármeńkesi» ótse, «Sádýaqas qajy Ǵylmanı» meshitinde 500 adamǵa aıttyq dastarqany jaıyldy.
Almaty meshitterinde aıt namazynan soń, ulttyq oıyn túrlerinen saıystar ótkizildi. Atap aıtsaq, arqan tartý, asyq atý, qoı kóterý syndy ulttyq sportty jany súıer er azamattar saıysta belsendilik tanytty. Oza shapqan júırikterdi baǵaly syılyqtarmen marapattap, mereke qyzyǵy arta tústi. Sondaı-aq Almaty Ortalyq meshitinde 500 adamǵa aıttyq dastarqany jaıylsa, 2500 balaǵa aıttyq syılyǵy taratyldy.
Almaty aımaǵy ókildigi merekeni sezindirý maqsatynda balalarǵa erekshe qurmet kórsetti. Máselen Ile aýdandyq «Sábdenuly Ótegen batyr» meshitini uıytqy bolýymen 500 balaǵa aıttyq syıy berilse, 500 dana shyryn men 500 dana balmuzdaq basqa balalarǵa taratyldy. Sondaı-aq ımamdar muqtaj otbasylardyń úılerine arnaıy aıtpen quttyqtaýǵa baryp, azyq-túlik salynǵan qoraptardy tabystady.
Shymkent meshitterinde de aıt namazynan keıin qol kúres, arqan tartýdan, kirtasyn kóterýden saıys ótti. Kil myqtydan kil myqtyny anyqtaǵan jarys sońynda jeńimpazdarǵa ókildiktiń arnaıy dıplomy men káde-syılyqtary tabys etildi. Sonymen birge shahar meshitterinde mereke kúnderi qaıyrymdylyq sharalary uıymdastyrylyp, muqtaj otbasylarǵa kómek kórsetildi.
Qaraǵandy ókildigi jamaǵatqa merekelik kóńil-kúı syılaý maqsatynda tańǵy as usynyp, sporttyq saıystar ótkizdi. Ásirese, qazaq kúresinen jarys ótip, beldesýlerge eresektermen birge balalar da qatysty. Bul kúni jas ta, jasamys ta arqan tartysyp, asyq atty. Osylaısha otyz kún orazadan keıingi aıtty erekshe kóńil-kúıde ótkizdi.
Qostanaı oblysynyń meshitterinde «Balalarǵa bazarlyq», «Aıttyq» káde syılyqtary taratyldy. Aıt shaıy uıymdastyrylyp, meshit aýlalarynda sporttyq sharalar ótkizildi.
Óskemen aımaǵy ókildiginde aıt namazynan soń babalar rýhyna Quran baǵyshtalyp, elimizdiń tynyshtyǵy men halqymyzdyń amandyǵy úshin duǵa jasaldy. Meshit aýlasyna alty qanat aqboz úı tigilip, «Ýaqyp» qorynyń atynan as-shaı taratyldy. Arqan tartý, kir tasyn kóterý, qol kúresi, toǵyzqumalaq, doıby, shahmattan ótken saıystarǵa jastar belsendi qatysyp, jeńimpazdarǵa syılyqtar tabys etildi. Sonymen qatar meshit aldynda «Bir kelgen on eki aıda Ramazan» atty oblystyq músháıra qorytyndylanyp, aqyndarǵa júlde taratyldy. Meshit aýlasynda aqyndar óleń oqyp, aıttyń ajaryn asyra tústi. Odan bólek aıt namazy aldynda meshitten dáris alǵan jas jetkinshekterge syılyqtar taratyldy.
Pavlodar oblystyq ókildigi uıymdastyrǵan merekelik sharalarda aımaqqa belgili ánshi-kúıshi ónerpazdar ónerlerin buqaraǵa pash etip, án men jyrdan shashý shashty. Bul kúni ulttyq sport oıyndaryna da mán berilip, jasóspirimder arasyna qazaq kúresi, arqan tartys, toǵyz qumalaq, kir tasyn kóterý sekildi saıystar da ótkizildi.
Taldyqorǵan óńiriniń ımamdary aıt namazynan soń elimiz ben jerimizdiń amandyǵyn tilep, jamaǵatpen birge duǵa jasady. Ulyq mereke namazdan keıin meshit aýlasynda sporttyq-qaıyrymdylyq sharamen jalǵasyn tapty.
Jambyl oblysynyń meshitteri qaıyrymdylyq sharalaryn uıymdastyryp, muqtaj otbasylardyń úılerine aıttyq qorjynyn jetkizip berdi. Aıt namazynan keıin meshit jamaǵatyna qurma taratylyp, ulttyq oıyndardan saıystar uıymdastyryldy.
Aqmola oblysynda aıt merekesine oraı jańa meshit el ıgiligine paıdalanýǵa berildi. Zastantsıonnyı kentindegi jańa qulshylyq ordasynyń ashylýyna Oblys bas ımamy Qýanysh Sábıt qatysyp, óńir turǵyndaryn Oraza aıtpen quttyqtady. 150 adamdyq jańa meshitte alǵashqy aıt namazy oqylyp, el amandyǵy úshin duǵa jasaldy.
Qyzylorda oblysynyń meshitterinde Aıt namazyn oqýǵa jıylǵan jamaǵat qulshylyǵyn oryndaǵan soń, aq dastarqannan dám tatyp, ulttyq sport oıyndaryna qatysty. Saıys jeńimpazdaryna qarjylaı jáne baǵaly syılyqtar tabystalsa, balalarǵa aıttyq táttileri taratyldy. Sonymen qatar, muqtaj jandarǵa azyq-túlikteı jáne t.b. kómek kórsetilip, qaıyrymdylyq sharalary uıymdastyryldy.
Batys Qazaqstan oblystyq ókildigi ortalyq meshitte 30 kún Quran hatym oqyǵan Shymkent qalasynyń «Yqylas» qarılar ortalyǵynyń shákirti, 17 jastaǵy qarı Abdýlazız Isaulynyń ıyǵyna shapan jaýyp, astyna at mingizse, «Aqsaqaldar alqasynyń» múshesi, meshit jamaǵaty, taraýyq namazyn úzbeı oqyǵan 80 jastaǵy Amangeldi Abdrahmanovqa umra qajylyǵynyń joldamasy syıǵa tartty. Namazdan keıin meshit janynan kıiz úı tigilip, baýyrsaqtar men kójeler tegin taratyldy. Balalarǵa arnalǵan «Aıt qutty bolsyn» qorjyndary berildi.
Atyraý oblysy jurtshylyǵy aıt merekesin joǵary deńgeıde atap ótti. Oblys, qala, aýdan, aýyl meshitterinde aýqymdy deńgeıde buqaralyq sharalar uıymdastyryldy. Aıt namazyna 23 myń adam qatysyp, ýaǵyz-nasıhattar aıtyldy. Aqsaqaldarǵa, analarǵa qurmet kórsetildi. Jamaǵat arasynda ulttyq oıyndardan jarystar uıymdastyrylyp, 10250 balaǵa aıttyq úlestirildi.
Mańǵystaý oblysynda da Oraza aıt merekesi keń kólemde atap ótildi. Qulshylyq úıiniń aýlasynda kıiz úıler tigilip, ulttyq salt-dástúr dáriptelip, qazaq kúresi, kirtasyn kóterý, arqan tartys syndy sporttyq oıyndar ótkizilip, jınalǵan jurtshylyqtyń kóńilin kóterdi. Jeńimpazdar men júldegerler arnaıy syılyqtarmen marapattalsa, kópshilik osyndaı is-sharany uıymdastyrǵan din qyzmetkerlerine alǵystaryn aıtyp, dán rıza bolyp qaıtty.
Aqtóbe oblysy meshitterinde 35 000 adam aıt namazyn oqydy. Tańmen talasa qulshylyqqa asyqqan halyqtyń úlkeni men kishisi qatar turyp sap túzep, ımamǵa uıyp, duǵa-tilekterin aıtty. Sonymen qatar aıt namazynyń aldynda «Zeket jáne qaıyrymdylyq» qorynyń «El úlesi – páterge» qaıyrymdylyq aktsııasy aıasynda respýblıka boıynsha 549, Aqtóbe óńiri boıynsha 26-baspana kilti Habıbolla qarı Raýshanǵa tabystaldy. Merekege oraı ulttyq sport túrlerinen saıys uıymdastyryldy. Ulyq merekede oblystyń bas ımamy Serikjan Enshibaıuly Nurıslam esimdi búldirshinniń tusaýyn kesip, salt-dástúrimiz nasıhattaldy. Odan ózge jınalǵan qaýym aıt dastarhanynan dám tatty.
