«QMDB EXPO-2026» HALYQARALYQ KÓRMESI QORYTYNDYLANDY
Qazaqstan musylmandary dinı basqarmasynyń Tóraǵasy, Bas múftı Naýryzbaı qajy Taǵanulynyń bastamasymen uıymdastyrylǵan halyqaralyq «QMDB EXPO-2026» kórmesi Almaty qalasynda óz máresine jetti.
Eki kúnge sozylǵan aýqymdy sharaǵa otandyq jáne sheteldik 100-ge jýyq kásiporyn qatysyp, óz ónimderi men qyzmetterin kópshilik nazaryna usyndy. Kórmeni eki kún ishinde 30 myńnan astam adam tamashalap, halal ónimdermen tanysyp, saýda jasady.
Kórme barysynda kelýshilerge 9 tonna sút ónimderi, 1 tonnaǵa jýyq balmuzdaq, 5 tonna et ónimderi, 4 tonna qus eti, 8 tonnaǵa jýyq kondıterlik ónimder, 5 tonnaǵa jýyq shujyq ónimderi, 3 tonnadan astam jartylaı fabrıkattar usynyldy. Sondaı-aq 5 tonnaǵa jýyq sýsyndar – kofe, shaı jáne sıroptar, 2 tonnaǵa jýyq emdik-profılaktıkalyq ónimder saýdaǵa shyǵaryldy.
«QMDB EXPO-2026» tek ónim usynatyn saýda alańy ǵana emes, otandyq jáne sheteldik kásipkerlerdiń ózara tájirıbe almasyp, jańa iskerlik baılanystar ornatýyna múmkindik bergen halyqaralyq alańǵa aınaldy.
Sonymen qatar eki kún boıy halal ındýstrııasy, ıslam qarjysy, kásipkerlik jáne bıznestiń áleýmettik jaýapkershiligi baǵytynda arnaıy is-sharalar uıymdastyrylyp, sala mamandary men sarapshylar tájirıbe almasty.
Kórme aıasyndaǵy arnaıy marapattaý rásiminde salada úzdik nátıje kórsetken kásiporyndar men mamandar «Úzdik halal kásiporyn», «Senim men sapa kepili» jáne «Úzdik maman» nomınatsııalary boıynsha marapattaldy.
