QMDB ǴULAMALAR KEŃESINDE QABYLDANǴAN PÁTÝA TANYSTYRYLDY
Astana qalasy ókildigine qarasty meshit ustazdaryna QMDB Ǵulamalar keńesinde qabyldanǵan qazirgi qoǵamda keńinen talqylanyp júrgen «chaıldfrı» ıdeologııasyna qatysty sharıǵı úkim tanystyryldy.
«Nursultan» meshitiniń ustazy, Astana qalasy ókildigi boıynsha Sharıǵat jáne pátýa bólimine jaýapty maman Tamırlan Darhanuly elorda ustazdaryna sanaly túrde balaly bolýdan bas tartý máselesine qatysty sharıǵı úkimdi túsindirdi.
Túsindirý barysynda «chaıldfrı» uǵymynyń máni, onyń otbasy ınstıtýty men urpaq jalǵastyǵyna qatysty máseleleri sóz boldy. Sharıǵı turǵydan bul ustanymnyń adam tabıǵatyna, neke maqsatyna jáne Islamdaǵy urpaq tárbıesi men jalǵastyǵyna qatysty kózqarastarǵa qaıshy ekeni aıtyldy.
Sonymen qatar júktilikti ýaqytsha keıinge qaldyrýǵa sharıǵatta belgili bir jaǵdaılarda ruqsat etiletini túsindirildi. Atap aıtqanda, densaýlyqty qalpyna keltirý nemese bala tárbıesine daıyndalý sekildi oryndy sebepter bolǵan jaǵdaıda erli-zaıyptylardyń ózara kelisimimen jáne densaýlyqqa zııan keltirmeıtin tásilderdi qoldanýǵa bolatyny aıtyldy.
Jıynda sondaı-aq júktilikti birjolata boldyrmaýǵa baǵyttalǵan tásilderge qatysty sharıǵı úkimder tanystyrylyp, bul máselede jaýapsyz pikir taratpaı, dinı suraqtardy bilikti mamandardan suraýdyń mańyzy atap ótildi.
Kezdesýdiń negizgi maqsaty – meshit ustazdarynyń qazirgi qoǵamda kóterilip júrgen otbasylyq jáne dinı máseleler boıynsha bilimin jetildirip, jamaǵatqa sharıǵı úkimderdi durys ári naqty jetkizýine baǵyt berý.
