QMDB: «Ihsan – tárbıe negizi» kitaby jaryq kórdi (FOTO+VIDEO)

Búgin Nur-Sultan qalasyndaǵy QMDB ǵımaratynda Bas múftı Naýryzbaı qajy Taǵanulynyń jetekshiligimen jaryqqa shyqqan «Ihsan – tárbıe negizi» kitabynyń tanytymy ótti.

Is-sharaǵa QMDB Tóraǵasy, Bas múftı Naýryzbaı qajy Taǵanuly, Aqparat jáne qoǵamdyq damý vıtse-mınıstri Serik Egizbaev, memleket jáne qoǵam qaıratkerleri – Myrzataı Joldasbekov, Oralbaı Ábdikárimuly, Ádil Ahmetov, Baqytjan Ertaev, Ǵarıfolla Esim, Senat depýtaty Nurtóre Júsip, Májilis depýtaty Baqytbek Smaǵul, Halyqaralyq Túrki akademııasynyń prezıdenti Darhan Qydyráli, Qazaqstan Jazýshylar Odaǵynyń tóraǵasy Ulyqbek Esdáýlet jáne Dinı basqarmanyń bólim basshylary men oblys ımamdary qatysty.

Igi is-shara qasıetti Quran oqýmen bastalyp, Bas múftı jıynǵa qatysýshylarǵa izgi tilegi men alǵysyn bildirdi. Naýryzbaı qajy Taǵanuly ıhsannyń baqytyn ımannan izdegen jurtymyzdyń júregine jaqyn ilim ekenin aıta kelip: «Ihsan ilimi áýeli pendeniń Allaǵa degen boısunýynan bastalady. Adam balasynyń Allaǵa degen ıhsany: aldymen ıman keltirý, buıyrǵan amaldaryn oryndaý, barlyq tyıym salǵan nárselerden aýlaq bolý, izgi amaldardy arttyrý. Quranda: «Negizinde Alla ádildikti, ıgilikti (ıhsandy) jáne aǵaıynǵa qaraılasýdy buıyrady. Sondaı-aq arsyzdyqtan, jamandyqtan jáne zorlyq-zombylyqtan tyıady. Túsinersińder dep senderge (osylaısha) nasıhat beredi», – dep baıandalǵan («Nahl» súresi, 90-aıat). Osy aıat elimizdegi musylman qaýymynyń júregine jetip, ǵıbrat alar degen úmittemiz», - dedi.

QMDB Tóraǵasy óz sózinde jańa kitaptyń jańashyldyǵyna toqtalyp, osy kitapty shyǵarýǵa yjdahattylyqpen úles qosqan azamattarǵa alǵys aıtty.

«Bul kitaptan árbir adamǵa asa qajet yqylas, nıet, yjdahat, turaqtylyq, tııanaqtylyq, Allaǵa, Quranǵa, Paıǵambarǵa degen mahabbat, nápsimen kúresý joldary, júrek dertinen arylý, rýh tazalyǵy, til tazalyǵy syndy kórkem minezdi qalyptastyratyn sıpattardy tulaboıymyzǵa sińirý qajettigin túsinemiz. Sonymen qatar, ata-ana, bala-shaǵa, kórshi-qolań, aǵaıyn-týys, aınaladaǵy adamdardyń aqysy jaıly qundy nasıhattar jazylyp, jaman ádetterden arylýdyń joldary kórsetildi» dedi Naýryzbaı qajy Taǵanuly.

Jıynnyń qurmetti qonaqtary da qundy eńbektiń jaryq kórýimen quttyqtap, Dinı basqarmanyń ıgi bastamalaryna jyly lebiz bildirdi.

Aıta keteıik, «Ihsan – tárbıe negizi» kitabynda «Jaratýshy Allaǵa ıhsan», «Tulǵalyq ıhsan», «Ihsan jáne qoǵam» syndy taraýlar qamtylyp, Islam ǵulamalarynyń ıhsan ilimi jaıly oı-tolǵamdary berilgen.