QMDB Islamdyq qarjy sektorynyń meńgerýshisi Qazaqstan Endaýment-qorlarynyń VI kásibı kezdesýinde baıandama jasady
Astana medıtsına ýnıversıtetinde Qazaqstannyń Endaýment-qorlarynyń VI kásibı kezdesýi ótti. Is-sharaǵa Qazaqstan musylmandary dinı basqarmasynyń Islam qarjysy sektorynyń meńgerýshisi Nurjan Jaqsylyquly qatysyp, ıslamdyq qarjy júıesiniń negizgi qaǵıdattary men onyń Ekonomıkalyq jáne áleýmettik áleýeti týraly baıandama jasady.
Kezdesý barysynda Endaýment-qorlarynyń bilim berý, ǵylym, medıtsına jáne qoǵam úshin mańyzdy ózge de salalardy turaqty qoldaýdaǵy róli sóz boldy. Sonymen qatar Endaýment-qorlarynyń ıslam mádenıetindegi balamasy sanalatyn ýaqyp ınstıtýtynyń erekshelikterine nazar aýdaryldy. Ýaqyptyń qoǵamdyq ıgilikke baǵyttalǵan, uzaq merzimdi ári úzdiksiz qoldaý kórsetýge múmkindik beretin tetik ekeni atap ótildi. Baıandama barysynda qazaq dalasynda «bólinbegen enshi» ataýymen kópshilik ıgiligine qyzmet etken ýaqyp nysandary týraly tarıhı derekter de keltirildi.
Nurjan Jaqsylyquly qatysýshylarǵa ıslamdyq qarjy quraldary týraly tanystyrylym usynyp, salanyń Ekonomıkaǵa tıgizer paıdasyna toqtaldy. Onyń aıtýynsha, ıslamdyq qarjy – naqty Ekonomıkany damytýǵa, qoǵamdyq ıgilikti arttyrýǵa jáne naryq qatysýshylary arasyndaǵy ádiletti qarym-qatynas ornatýǵa baǵyttalǵan. Islamdyq qarjylandyrý saýda, jalǵa berý jáne seriktestik qatynastaryna negizdele otyryp, naqty aktıvtermen qamtamasyz etiletin (asset-backed) ári naqty Ekonomıkada qosymsha qun týdyratyn balama qarjy modelin usynady.
Baıandamashylar ıslamdyq qarjy quraldaryn Endaýment-qorlarynyń qarajatyn basqarýda balama qural retinde qoldaný múmkindikterin talqylady. Sharaǵa elimizdiń túrli joǵary oqý oryndarynan kelgen Endaýment-qorlarǵa jaýapty mamandar qatysyp, spıkerlerge suraqtaryn qoıyp, óz tájirıbeleri men pikirlerin ortaǵa saldy.
Jıyn qorytyndysynda sharaǵa arnaıy kelgen Qazaqstan Respýblıkasynyń Ǵylym jáne joǵary bilim mınıstrliginiń ókili uıymdastyrýshylar men qatysýshylarǵa alǵysyn bildirip, alǵys sertıfıkattaryn tabystady.
