QMDB: Medreselerdegi bilim berý máselesi talqylandy (FOTO)
Qazaqstan musylmandary dinı basqarmasynyń ortalyq apparatynda Bas múftıdiń keńesshisi Baltabaı Mekejanov pen Dinı bilim jáne kadr daıarlaý bóliminiń meńgerýshisi Smaıyl Seıtbekovtiń, sondaı-aq, elimizdegi medrese-kolledj dırektorlary jáne arnaıy pán ustazdarynyń qatysýymen is-qaǵazdardy biryńǵaı júrgizý jáne modýldik oqytý tehnologııasyna kóshýde oqý-ádistemelik quraldardy birizdilikke túsirý jóninde jıyn ótti.
Aldymen Bas múftıdiń keńesshisi Baltabaı Mekejanov jıyndy ashyp, qatysýshylarǵa sáttilik tiledi. Odan keıin Dinı bilim jáne kadr daıarlaý bóliminiń meńgerýshisi Smaıyl Seıtbekov 2020-2021 oqý jylyna qabyldaý emtıhandarynyń qorytyndysymen tanystyrsa, medrese basshylary, ustazdary jańa oqý jylyndaǵy onlaın dáristerdiń ótý barysyn baıandady.
«Búginde elimizdegi 9 medresede 1967 shákirt bilim alyp jatyr. Onyń 1323-i ul bala, 644-i qyz bala. Al bıyl oqýǵa 1185 talapker qujat tapsyrsa, sonyń 754-i medreselerimizge qabyldandy. Eldegi karantın jaǵdaıyna baılanysty qabyldaý emtıhandary onlaın rejımde ótti» dedi S.Seıtbekov.
Budan keıin Dinı bilim jáne kadr daıarlaý bólimi meńgerýshisiniń orynbasary Serikbol Arshabaev qashyqtyqtan oqytý dáristeriniń beınematerıaldaryn ázirleý joldarymen tanystyrsa, olardy daıyndaýdy ár medrese ózara bólip aldy.
Sondaı-aq, medrese ustazdary jańa oqý jylyndaǵy modýldik oqytý baǵdarlamasymen tanysyp, oǵan qajetti oqýlyqtardy biryńǵaılady. Naqtyraq aıtqanda, 1, 2 jáne 3-shi kýrstarda ótetin pánder men ádebıetterdiń tizimi talqylanyp, bekitildi.
Jıyn barysynda medreselerdegi is-qaǵazdaryn júrgizý máselesi de qaralyp, dinı bilim ordalarynyń ataýyn birizdilikke túsirý jóninde sheshim qabyldandy.
