QMDB men Marmara ýnıversıteti arasynda yntymaqtastyq týraly memorandým jasaldy (FOTO)
Túrkııanyń Stambul qalasynda QMDB Tóraǵasy, Bas múftı Naýryzbaı qajy Taǵanuly men Marmara ýnıversıtetiniń rektory, professor Mustafa Kýrt ekijaqty ǵylymı jáne mádenı yntymaqtastyq týraly memorandýmǵa qol qoıdy.
Atalǵan kelisim Qazaqstan men Túrkııa Respýblıkasy arasyndaǵy dostyq qarym-qatynasty negizge ala otyryp, Qazaqstan musylmandary dinı basqarmasy men Marmara ýnıversıteti arasyndaǵy dostyq pen yntymaqtastyqty arttyrý jáne dinı bilim berý salasynda jan-jaqty qoldaý kórsetýge baǵyttalǵan.
Kelisim aıasynda QMDB dinı bilim alýǵa nıetti qazaqstandyq talaperlerdi Marmara ýnıversıtetine joldaı alady. Elimizdegi Nur-Múbarak Egıpet ıslam mádenıeti ýnıversıtetiniń oqytýshylary men Marmara ýnıversıtetiniń oqytýshylar quramy arasynda ózara tájirıbe almasý maqsatynda kezdesýler men kýrstar uıymdastyrý kózdelmek. Dárister men semınarlar uıymdastyrý úshin bilikti din ǵalymdarymen tájirıbe almasý da osy kelisim aıasynda júzege asady. Atalǵan memorandým qol qoıylǵan kúnnen bastap 5 jylǵa deıin kúshinde bolady.
Ekijaqty kezdesý barysynda taraptar dinı bilimnen bólek áleýmettik pánderdi de damytý týrasynda kelisimge keldi. Búginde bul ýnıversıtette 124 qazaqstandyq shákirt bilim alýda. Al jalpy alǵanda oqý ordasynda 80 myń stýdent bar.
Aıta keteıik kezdesýge Dinı basqarma delegatsııasynan bólek Qazaqstannyń Stambuldaǵy Bas konsýly Álim Baıel, Marmara ýnıversıteti ılahııat fakýltetiniń dekany, professor Ismaıl Sefa Ýstýn qatysyp, atalǵan memorandýmǵa qoldaý kórsetti.
