QMDB TÓRAǴASY «ÁL-ǴANI» MEShITINDE ÝAǴYZ AITTY (FOTO)
Bas múftı Naýryzbaı qajy Taǵanuly elordadaǵy «Ál-Ǵanı» meshitinde taraýyq namazyna qatysyp, jamaǵatqa ýaǵyz aıtty.
«Ramazan aıynda týystyq qatynasty kúsheıtýdiń mańyzy» taqyrybynda nasıhat aıtqan QMDB Tóraǵasy aǵaıynmen aralasý, jaqynyńa qaraılasýdyń mańyzyna toqtalyp, orazanyń týystarmen qarym-qatynasta da úlken múmkindik ekenin tilge tıek etti.
«Qasıetti Ramazan aıynda atqarylatyn úlken saýapty isterdiń biri – týystyq qatynasty nyǵaıtý. Týystyq qatynasty saqtaý – Alla Taǵalanyń bizderge ámir etken buıryqtarynan. Qasıetti Quranda: «Negizinde Alla ádiletti, ıhsandy jáne aǵaıynǵa qaraılasýdy buıyrady», – dep aıtylǵan («Nahyl» súresi, 90-aıat).
Ǵalymdarymyz týystyq qatynasty saqtaýǵa: «Adamnyń óz shamasyna saı týysqanynyń qajetinen tabylyp, jaqsylyq jasaı bilýin aıtamyz», – dep anyqtama bergen. Ámr ıbn Ál-As (Alla ony raqymyna alsyn) ardaqty Paıǵambarymyzdan (oǵan Allanyń salaýaty men sálemi bolsyn) adamdarǵa ne úshin jiberilgenin suraǵanda: «Meni týystyq qatynastardy nyǵaıtý úshin jiberdi», – degen.
Alla Elshisiniń ózi (oǵan Allanyń salaýaty men sálemi bolsyn) týystyq baılanysty berik saqtaıtyn ári ózgelerge de týystarymen baılanysty úzbeýdi árkez ósıet etetin bolǵan. Qasıetti Ramazan aıy – týystyq qatynasymyzdy nyǵaıtyp, olarǵa jaqsylyq jasaýdyń tamasha múmkindigi. Bul sharapatty aıda týystarymyzben qarym-qatynasqa da basa kóńil bólgenimiz durys» dedi Naýryzbaı qajy Taǵanuly.
Budan keıin Bas múftı meshit jamaǵatymen birge taraýyq namazyn oqyp, el amandyǵy men ıgiligi úshin duǵa jasady.
