QMDB tóraǵasy Aqmola oblysynyń bir top jamaǵatymen kezdesti (FOTO)

QMDB Tóraǵasy, Bas múftı Naýryzbaı qajy Taǵanuly Dinı basqarmaǵa arnaıy kelgen Aqmola oblysynyń bir top jamaǵatymen kezdesti. Is-sharany QMDB Aqmola oblystyq ókildigi men «Zerdeli urpaq» jastar uıymy uıymdastyrdy.

Bas múftı kezdesý barysynda baýyrlarymyzǵa Qazaqstandaǵy dástúrli Islam jáne Ihsan iliminiń mańyzy týraly nasıhat aıtty.

«Qazaq halqy qashan da birlikti basty orynǵa qoıa bilgen. El arasynda «birligi kúshti el ozady», «birlik bolmaı, tirlik bolmas» degen qanatty sózder keń taraǵan. Bul maqaldar qazir de mańyzyn joıǵan joq. Paıǵambarymyz Muhammed (oǵan Allanyń salaýaty men sálemi bolsyn) musylman úmbetin jamaǵatpen birge bolýǵa shaqyrǵan. Alla Elshisi: «...Kópshilikpen birge bolyńdar! Bólinýden saqtanyńdar», – dep ósıet qaldyrǵan. Alla Taǵala qasıetti Qurannyń «Álı Imran» súresinde: «...Bólinbeńder» dep ámir etken. Islamdy ustanǵan ata-babalarymyz qashan da yntymaq pen bereke-birlikti tý etken. Al búgingi urpaqtyń enshisine osynaý úrdisti jalǵastyrý ǵana qalyp otyr», – dedi Bas múftı.

Kezdesý sońynda QMDB Tóraǵasy qonaqtarǵa «Muftiyat» baspasynda jaryq kórgen «Ihsan – rýhanı tárbıe negizi» kitabyn syıǵa tartý etti.

Sondaı-aq qonaqtar Dinı basqarma ǵımaratyn aralap, bólim jumystarymen tanysty. Múftııat jáne onyń qyzmet barysy jaıly aqparat aldy.