QMDB TÓRAǴASY ATYRAÝDAǴY «IMANǴALI» MEShITINDE JUMA ÝAǴYZYN AITTY (FOTO)

Búgin Qazaqstan musylmandary dinı basqarmasynyń tóraǵasy, Bas múftı Naýryzbaı qajy Taǵanuly Atyraý oblystyq «Imanǵalı» ortalyq meshitinde jamaǵatqa juma ýaǵyzyn aıtty.

«Árbir isti kórkem túrde atqarý» degen taqyrypta nasıhat aıtqan QMDB Tóraǵasy aldymen Atyraý jamaǵatyn Ramazan aıymen quttyqtady. Ásirese osy aıda Allanyń razylyǵy úshin atqarylatyn isterdi eń kórkem ári joǵary deńgeıde atqarýǵa tıis ekenin, onyń saýaby basqa aılardan artyǵyraq bolatynyn eske saldy.

«Alla Taǵala jaratylystardyń ishinde adam balasyn qurmetti etti. Ony aqyl-sana arqyly ereksheledi. Ózine sonshalyq nyǵmet bergen Jaratýshysyna shúkirlik retinde adam balasy da Onyń ámirlerin eń kórkem túrde, ıaǵnı ıhsan dárejesinde atqarýǵa tyrysýy qajet. Alla Taǵala qasıetti Qurandaǵy «Qasas» súresiniń 77-aıatynda: «Alla saǵan kórkem jaqsylyq etkenindeı sen de kórkem túrde jaqsylyq iste», – dep buıyrǵan. «Ál-ıhsaný» (الاحسان) sózi «áhsana» (أَحسن) etistiginen týyndap «qandaı da bir isti kórkem túrde isteý, jaqsylyq jasaý» degen maǵynalardy qamtıdy. Al ıhsannyń kórinis tabatyn bir kezeńi – Ramazan aıy. Óıtkeni osy aıda tutatyn orazamyz Qudaı men pende arasyndaǵy syr bolyp sanalady. Basqa qulshylyqtardyń syrtqy sıpaty kórinse, oraza tek Alla Taǵalaǵa ǵana málim bolady» dedi Naýryzbaı qajy Taǵanuly.

Sondaı-aq Bas múftı juma namazyn Atyraý jamaǵatymen birge oqyp, el men jerdiń amandyǵy úshin duǵa jasady.

​