QMDB TÓRAǴASY MEDRESE ShÁKIRTTERINE DÁRIS OQYDY (FOTO)

Búgin QMDB Tóraǵasy Naýryzbaı qajy Taǵanuly Pavlodar oblysyndaǵy jumys saparyna saı «Ábý Bákir Syddyq» medrese-kolledji shákirtterimen kezdesip, dáris oqydy.

Bas múftı bilim jolyndaǵy jastardy jigerlendirip, ultty súıý, salt-dástúrdi saqtaý, elge qyzmet, ata-anaǵa qurmet jaıly nasıhatyn jetkizdi.

«Bilim alý, onyń ishinde dinı bilim alamyn dep kelgen talpynys-nıetterińe Alla saýaptan jazsyn! «Oqý – ınemen qudyq qazǵandaı» dep sýretteledi. Onyń qıyndyǵy kóp. Osy jolda birneshe jyl talmaı izdensek qana, tabysqa jetemiz. Ardaqty Paıǵambarymyz (oǵan Allanyń salaýaty men sálemi bolsyn): «Bilim alý musylman er men áıelge – paryz», – dep bilim alýdyń dindegi orny erekshe ekenin eskertken. Sondyqtan bizdiń ǵylym-bilim úırenip, bilgenimizdi basqalarǵa úıretýimiz – paryz. Sebebi hadısterden jetkendeı, bilimdi jaıý – Alla jolynda jasalǵan úlken sadaqa. Sonymen qatar bilim – baqyttyń kilti, jánnatqa jeteleıtin úlken nyǵmet» degen Naýryzbaı qajy Taǵanuly bilimniń mańyzyna toqtaldy. Bas múftı kezdesý sońynda shákirttermen erkin áńgime quryp, medresege tartý jasady.

Aıta keteıik, Pavlodar oblysynda QMDB-ǵa qarasty «Ábý Bákir Syddyq» medresesi jumysyn jalǵastyryp keledi.  2020 jyly medrese-kolledj bolyp memlekettik lıtsenzııasy jańartyldy. Qazirgi ýaqytta «Ábý Bákir Syddyq» medrese-kolledjinde jalpy 49 shákirt bilim alyp jatyr. Bıylǵy 2022-2023 oqý jylynda 9-synyptan keıin 41 bala qujat tapsyryp, 30 talapker oqýǵa qabyldandy. Qazirgi tańda 1 kýrsta – 30 stýdent, 2 kýrsta – 4 stýdent, 3 kýrsta – 7 stýdent, dýaldy oqýda 9 adam (aýdan, aýyl ımamdary) bilim alýda.