QMDB tóraǵasy Omby múftıimen kezdesti (FOTO)
Búgin elordada Bas múftı Naýryzbaı qajy Taǵanuly Reseı Federatsııasy Omby jáne Omby oblysy musylmandary dinı basqarmasynyń tóraǵasy Bota Bakýlınmen kezdesti.
Kezdesýde Bota qajy Bakýlın elordada «Táýelsiz Qazaqstan jáne Islam qundylyqtary» taqyrybynda ótken halyqaralyq konferentsııaǵa shaqyrtý jibergen Bas múftı Naýryzbaı qajy Taǵanulyna rızashylyq nıetin jetkizdi.
«Atamekende ótken úlken halyqaralyq jıynǵa qatysýymyz – sizderdiń Omby jerindegi barsha qandas baýyrlar men musylman jamaǵatyn qoldaýyńyz dep qabyldaımyz. Shaqyrtýyńyzǵa úlken raqmetimdi jetkizemin» dedi mártebeli meıman.
Basqosý barysynda Omby oblysyndaǵy qazaq ımamdaryn qyzmettik shapanmen qamtamasyz etý, shettegi qandastarǵa Dinı basqarmanyń tól basylymdary – «Munara» gazeti men «Iman» jýrnalyn, sonymen qatar dinı kitaptardy jetkizý máselesi talqylandy. Naýryzbaı qajy Taǵanuly bul baǵytta Dinı basqarma tarapynan kómek kórsetiletinin jetkizdi.
«Sizdiń halyqaralyq basqosýda tebirenispen aıtqan sózderińiz qymbat qazynamyz – táýelsizdiktiń qadirin baǵalaı bilýge jeteledi. Alla Taǵala táýelsizdigimizdi baıandy etsin» dedi Bas múftı Naýryzbaı qajy Taǵanuly.
