QMDB tóraǵasy óner jáne mádenıet salasynyń ókilderimen kezdesti (FOTO)

Qazaqstan musylmandary dinı basqarmasynyń tóraǵasy, Bas múftı Naýryzbaı qajy Taǵanuly Almatyda óner, mádenıet jáne sport salasynyń ókilderimen kezdesti.

Almaty Ortalyq meshitinde ótken taǵylymdy basqosýǵa QMDB Apparat basshysy Ǵylymbek Jádigeruly, Din isteri jáne taldaý bóliminiń meńgerýshisi Nurbek Áýeshanuly, Aqparat jáne qoǵammen baılanys bóliminiń meńgerýshisi Marat Dálelhanuly, Almaty qalasynyń bas ımamy Erkinbek Shoqaı jáne de elimizge tanymal bir top mádenıet jáne sport salasynyń úzdikteri qatysty.

Bas múftı búgingi tańda áleýmettik jeliniń úlken kúshke aınalǵanyn tilge tıek etip, ásirese, jastar kóp ýaqytyn ótkizetin ǵalamtor áleminde únemi jaqsylyqty nasıhattap júrgen óner adamdaryna, mádenıet salasynyń úzdikterine alǵys bildirdi.

Jıyn barysynda Sáken Qalymov, Serjanáli Álibek, Ardaq Nazarov, Madııar Serikbaev syndy óner, sport juldyzdary udaıy qaıyrymdy isterdiń basynan tabylyp, jaqsylyqty nasıhattap júrgen Dinı basqarma men meshit ımamdarynyń jumysyn joǵary baǵalap, aldaǵy ýaqytta da izgi isterge atsalysýǵa daıyn ekendikterin jetkizdi.