QMDB tóraǵasy Pavlodarda Máýlit keshinde ýaǵyz aıtty (FOTO)

Pavlodar oblysyna jumys saparymen kelgen Qazaqstan musylmandary dinı basqarmasynyń tóraǵasy Naýryzbaı qajy Taǵanuly Estaı atyndaǵy mádenıet saraıynda ótken Máýlit keshine qatysyp, jınalǵan jamaǵatqa ýaǵyz aıtty.

«Biz – ata-anasyn qadirlegen, balasyn izgilikke tárbıelegen joraly jurttyń urpaǵymyz. Sanany turmys bılegen zamanda rýhanı turǵydan kemeldený asa mańyzdy istiń birine aınaldy. Osy kıeli Kereký óńirinde Murat ıshan, Isabek ıshan, Máshhúr Júsip Kópeıuly syndy ǵulamalarymyz din taratyp, halyqty dinı, rýhanı turǵydan aǵartý isine súbeli úles qosty. Sol babalarymyzdyń jolyn jańǵyrtý maqsatynda biz Ihsan ilimin nasıhattaýdy qolǵa aldyq.

Sizderdi Máýlit merekesimen quttyqtaımyn! Dos-baýyrǵa, aǵaıyn-týysqa meıirimdi bolý – Alla elshisin jaqsy kórý degen sóz. Alla Taǵala barshamyzǵa meıirimin tógip, Paıǵambarymyzdyń (oǵan Allanyń salaýaty men sálemi bolsyn) shapaǵatyn násip etsin» dedi Naýryzbaı qajy Taǵanuly.

Bas múftı rýhanı kesh barysynda kómekke muqtaj otbasylarǵa Máýlit syıyn tabystady. Sonymen qatar «Zeket jáne qaıyrymdylyq qorynyń» «El úlesi – páterge» jobasymen berilgen qyzmettik páter kiltin aýyl ımamyna tabystady.

Aıta ketsek, Máýlit syıyn alǵandar arasynda kópbalaly jalǵyzbasty analar, ákeler men naýqas jandar bar.

Máýlit keshinde Alla elshisine (oǵan Allanyń salaýaty men sálemi bolsyn) salaýat aıtylyp, óner ókilderi ǵıbratty tolǵaý-terme oryndady.