QMDB tóraǵasy «Qamqor-Sharapat» ortalyǵynyń jumysymen tanysty (FOTO)

Bas múftı Qostanaı oblysyna barǵan saparynda qalalyq «Jaılaýbaı ata» meshiti janynan ashylǵan «QAMQOR-SHARAPAT» dinı salttyq qyzmet kórsetý ortalyǵynyń jumysymen tanysty.

Qostanaı oblysynyń bas ımamy Bahytbek Tájimbet Bas múftıge ortalyq jumysyn tanystyrdy. Bas ımam halyqqa dinı salttyq qyzmet kórsetý, musylmansha jerleý baǵyty boıynsha atqarylyp jatqan jumystar jaıly baıandady.

Naýryzbaı qajy Taǵanuly ımamdar forýmynda «Zırat jáne zııarat mádenıeti», «As berý mádenıeti» qujattary qabyldanǵanyn atap ótti. Atalǵan qujattardyń negizgi maqsaty – halyq arasynda qudaıy as berý, zırat kóterý men qabirlerdi zııarat etýdiń sharıǵatqa saı ádebi men ortaq mádınetin qalyptastyrý.

«Keıde keıbir kisiler jaqyn týysy qaıtqan kezde ysyrapqa jol berip, sharıǵatymyz talap etpegen is-áreketter jasap jatady. Biz osy máseleni sheshýdiń balama joly retinde meshit janynan dinı salttyq qyzmet kórsetý ortalyqtaryn ashyp, qazaly úıge barynsha kómek kórsetip kelemiz. Sonymen qatar as berý ádebin qalyptastyrý baǵytynda halyqty ysyrapqa jol bermeýge úndeımiz. Allaǵa shúkir, jalpy jamaǵat pen zııaly qaýym ókilderi bul bastamamyzdy qoldap, ózderiniń izgi nıetterin jetkizýde», – dedi Naýryzbaı qajy Taǵanuly.

Aıta ketsek, ortalyqta máıitti musylmansha jerleýge qajetti qolaıly jaǵdaı jasalǵan.