QMDB TÓRAǴASY «QURAN KÁRIM» KÓRMESINIŃ AShYLÝYNA QATYSTY (FOTO)
Búgin, qasıetti juma kúni QMDB janyndaǵy Respýblıkalyq bas meshitte qasıetti Ramazan aıynyń qurmetine «Quran Kárim» kórmesi ashyldy. Saltanatty rásimge Bas múftı Naýryzbaı qajy Taǵanuly arnaıy qatysty.
QMDB Quran sektorynyń meńgerýshisi Serik qarı Ahmet kórmege qoıylǵan Qurannyń kóne qoljazbalary, onyń ishinde elimizden tabylǵan kóne kitaptar, 15-ke tarta aýdarma nusqalary, túrli tápsir kitaptary, braıl qarpimen jazylǵan Qurandy Bas múftıge tanystyryp ótti. Óz kezeginde Naýryzbaı qajy Taǵanuly qasıetti Ramazan aıy qarsańynda uıymdastyrylǵan kórmege joǵary baǵa berdi.
«Alla Taǵala Qasıetti Quranda: «Ramazan aıy sondaı bir aı, ol aıda adam balasyna týra jol jáne (aq pen qarany) aıyratyn dálel túrinde Quran túsirildi» deıdi. Demek, Ramazan aıynyń basqa aılardan qasıetti bolýynyń basty sebebi – ol aıda jalpy adamzattyń, onyń ishinde musylman áleminiń basty qundylyǵy Alla sóziniń jer betine túsýi. Demek, musylman balasy Ramazan aıynda oraza tutýmen qatar Quran Kárimge kóbirek kóńil bólýi kerek. Qasıetti kitabymyzdy halyqqa nasıhattap jatqan kórme jumysyna Alla bereke bersin» dedi Bas múftı.
Aıta keteıik, kórmege Quran qatysty basqa da málimetter, jádigerler qoıylǵan. Sondaı-aq kórmede belgili hattat, kallıgrafııa sheberi, arabsha kórkem jazýdan Orta Azııa boıynsha alǵash ret ıjaza alǵan, elimizde kóptegen meshit ǵımarattaryna, onyń ishinde osy Bas meshit ǵımaratynyń ishi-syrtyna aıattar jazǵan Asylbek Orynbasar da kelýshilerdi Quran aıattaryn jazý isimen tanystyrmaq. Úsh kúndik kórmeni elorda turǵyndary men qonaqtary tamashalaı alady.
