QMDB TÓRAǴASY QYZYLORDADA MEShIT JAMAǴATYNA NASIHAT AITTY (FOTO)

Búgin Qyzylorda oblysyna jumys saparymen barǵan Bas múftı Naýryzbaı qajy Taǵanuly qalalyq tarıhı «Aıtbaı» meshitinde jamaǵatpen júzdesti.

QMDB Tóraǵasy jamaǵatqa din men dástúr sabaqtastyǵy, ulttyq qundylyqtar, musylman úmbetiniń rýhanı tutastyǵy, bir mázhabty ustanýdyń mańyzy, dinı jalań urandarǵa ermeý, arandatýshy dinı aqparattarǵa aldanbaý týraly nasıhat aıtty.

Bas múftı meshit jamaǵatyn dinı máselege qatysty suraqtardyń jaýabyn Qazaqstan musylmandary dinı basqarmasynyń ǵalymdary men ımamdarynan alýǵa, resmı meshit qyzmetkerleriniń keńesine júginýge shaqyrdy.

Basqosý barysynda jamaǵat kókeıde júrgen suraqtaryn Bas múftıge qoıyp, jaýap aldy.