QMDB TÓRAǴASY TÚRKISTANDA JAŃA MEShITTIŃ AShYLÝYNA QATYSTY (FOTO)
Búgin Túrkistan qalasynda áıgili sahaba Abdýrrahman ıbn Aýf esimin ıelengen jańa meshit ashyldy. Qulshylyq úıiniń ashylý rásimine QMDB Tóraǵasy, Bas múftı Naýryzbaı qajy Taǵanuly, qala ákimi Nurbol Turashbekov, jergilikti aqsaqaldar men demeýshi azamattar qatysty.
Alǵashqy quttyqtaý sóz alǵan Bas múftı meshittiń mańyzyna toqtalyp ótti.
«Paıǵambarymyzdyń (oǵan Allanyń salaýaty men sálemi bolsyn) hadısterinde aıtylǵandaı meshitke kelýshilerdiń oń aıaǵyna saýap jazylyp, dárejesi artatyn bolsa, árbir basqan sol aıaǵy arqyly kúná-kemshilikteri keshiriledi. Meshittiń ataýy ardaqty sahaba Abdýrahman ıbn Aýf (Alla oǵan razy bolsyn) esimimen ataldy. Jánnatpen súıinshilengen on sahabanyń bireýi – osy Abdýrrahman ıbn Aýf. Paıǵambarymyzǵa (oǵan Allanyń salaýaty men sálemi bolsyn) alǵash ıman etken kisilerdiń segizinshisi bolǵan ol hazireti Ábý Bákirdiń sebepkerligimen Islamdy qabyldaǵan. Pil jylynda dúnıege kelgen Abdýrrahman ıbn Aýf Paıǵambarymyzben túıdeı qurdas edi. Bádir shaıqasynda úlken erlik kórsetedi. Bir top múshrik qorshap alǵanda ony ýaıymdaǵan bir sahabaǵa ardaqty Paıǵambarymyz «Ol úshin qoryqpa. Perishteler oǵan kómektesýde» degen. Mine osyndaı áıgili sahaba kóptegen joryqtarǵa qatysyp, asyl dinimizge jan-tánimen qyzmet etti. Búgin sondaı qurmetti sahabanyń esimi meshitimizge berilip jatyr. Biz árıne Islam dinine qyzmet etken, aty tarıhta qalǵan din ǵulamalary, sahabalar jáne qazaq halqynyń ardaq tutqan asyl azamattarynyń esimderin meshitke berip kelemiz. Árbir ataýdyń máni, tarıhı taǵylymy bolýy kerek.
Alla Taǵala Quran Kárimde: «Alla Taǵalanyń meshitterin tek Allaǵa jáne aqyret kúnine ıman etken, namaz oqyǵan, zeketin bergen jáne Alladan basqa eshkimnen qoryqpaıtyndar ǵana salady», – deıdi (Táýbá súresi, 18-aıat). Jaratýshy Allanyń razylyǵy úshin baýyrlarymyz osyndaı saýapty iske dem bergen eken. Nıetterińiz qabyl bolsyn! Isterińizge bereke bersin. Endi osy meshitten eldiń tutqasyn ustar, dindi kórkeıtetin azamattar shyqsyn deımin. Barshańyzǵa Alla razy bolsyn» dedi Bas múftı.
Ashylý rásiminde qala ákimi de quttyqtaýyn jetkizip, Alla úıiniń mán mańyzyn aıtyp ótti. Qulshylyq úıiniń qurylysy 2018 jyly bastalyp, búgin el ıgiligine berilip otyr. Meshit ǵımaraty 300 adamǵa shaqtalǵan.
