QMDB tóraǵasy Túrkııadaǵy «Talaba» qaýymdastyǵy múshelerimen kezdesti (FOTO)
QMDB Tóraǵasy, Bas múftı Naýryzbaı qajy Taǵanuly bastaǵan delegatsııa Túrkııada dinı bilim alyp jatqan «Talaba» qaýymdastyǵy múshelerimen kezdesti.
Kezdesýde Bas múftı Túrkııadaǵy shákirtterdi el táýelsizdiginiń 30 jyldyǵymen quttyqtap, QMDB-nyń tyń bastamalary jaıynda az-kem aqparat berdi. Sondaı-aq Naýryzbaı qajy Taǵanuly Túrkııaǵa QMDB-nyń jaýapty ókili retinde taǵaıyndalǵan Jandos Aıtbaevty tanystyryp, jumysyna sáttilik tiledi.
Kezdesýde Dinı basqarma tóraǵasy bilim alýdyń artyqshylyǵy, ǵalymdardyń mindeti, jastyq shaqtyń qadiri, týǵan elge súıispenshilik týrasynda óz nasıhatyn jetkizdi.
«Jas kezde alǵan bilimniń ǵumyry uzaq bolady. Ári ol bilim Siz úshin ómir boıy qyzmet etedi. Jas kezde Quran jattaý, hadıs jattaý jeńil. Alla Taǵala Sizderdiń jastyq shaqtaryńyzǵa osyndaı nyǵmet berip qoıdy. Endi Alla qalasa osy alǵan bilimdi týǵan jerde, elge kelip óristetýdi oılaý kerek. Abaı Qunanbaıuly «Adam balasynyń eń jamany – talapsyzdyq» deıdi. Biraq Sizder talaptaný, eńbektený arqyly ilim jolyna tústińizder. Oqý – ınemen qudyq qazǵandaı dep beker aıtylmasa kerek. Endeshe osy jolda, dinı bilim alý jolyndaǵy ár kúnderińiz saýapqa toly bolsyn», – dedi Bas múftı.
Kezdesý barysynda naıb múftı, sharıǵat jáne pátýa bóliminiń meńgerýshisi Sansyzbaı Qurbanuly, Apparat basshysy Ǵylymbek Jádigeruly men dinı bilimge jaýapty Smaıyl Súıerqululy jáne ýaǵyz-nasıhat bóliminiń meńgerýshisi Batyrjan Berdenuly shette júrgen tálimgerlerge taǵylym aıtyp, óz tájirıbelerimen bólisti.
Aıta keteıik Bas múftımen bolǵan júzdesýge Stambuldaǵy shákirtterden bólek Bas konsýldyń keńesshisi Qýat Raev arnaıy qatysty. Kesh sońynda Naýryzbaı qajy Taǵanuly stýdentterge Dinı basqarmanyń «Mýftııat baspasynan» shyqqan «Ihsan ilimi» men «Tolyq adam» kitabyn syıǵa tartty.
