QMDB TÓRAǴASY JAMAǴATTY JAŃA MEShITTIŃ AShYLÝYMEN QUTTYQTADY

Qazaqstan musylmandary dinı basqarmasynyń tóraǵasy Naýryzbaı qajy Taǵanuly Qyzylorda qalasynda «Qajy Myrqyaıdar» meshitiniń ashylý rásimine qatysyp, ıgi tilegin bildirdi. Jıynǵa Qyzylorda oblysynyń ákimi Nurlybek Nálibaev ta qatysyp, quttyqtaýyn jetkizdi.

«Baǵzy zamandardan babalarymyzdyń qaster tutyp, atadan balaǵa amanattap, qaldyrǵan asyl qasıetterimiz – ımandylyq, ádilettilik, izgilik, meıirimdilik murattaryn jastarymyzǵa jetkizýde, durys dúnıe tálim-tárbıe berýge meshitterdiń úlesi ushan-teńiz. Sol sebepti de musylman adam meshitterdi barynsha qurmettep, onda baryp ǵıbadat-qulshylyq jasap, tálim-tárbıe úırenip, júreginiń árdaıym qulshylyq ornymen rýhanı baılanysta bolýyna nazar aýdarady.

«Meshit – adamnyń júregi tynyshtyq taýyp, jany erekshe rýhanı lázzattqa bólenetin qasıetti oryn. Anyǵynda, búkil múlik Jaratýshymyz Alla Taǵalaniki. Sonyń ishinde meshitterge úlken qurmetti bildirtý úshin olardy «Allanyń úıleri» dep ataımyz. Alla Taǵala qasıetti Quranda: «Shyn máninde meshitter Allaniki» («Jyn» súresi, 18-aıat), – dep aıtqan. Buqar jyraý babamyz da osy maǵynada: «Haqtyń úıi meshitti, Aqty Qudaı sheshipti», – dep meshitti «Haqtyń úıi» degen. Musylman adamnyń meshitterdi syılap, qurmetteýi – onyń Jaratýshy Alla Taǵalaǵa degen qurmetin bildiredi. Sol sebepti de árbir musylman meshitti bar ynta-peıilimen jaqsy kórip, qurmettep, barynsha ádep saqtaýy qajet. Alla jańa meshitimizdi qutty etsin» dedi Naýryzbaı qajy Taǵanuly.

Bas múftı meshitti salýǵa atsalysqan azamattarǵa alǵys bildirdi.

​