QMDB tóraǵasy jańa meshitte juma ýaǵyzyn aıtty (FOTO)

Búgin Túrkistan oblysyna jumys saparymen barǵan Bas múftı Naýryzbaı qajy Taǵanuly Keles aýdanynda jańadan ashylǵan «Satybaldy Imanberdiuly» meshitinde juma namazyn júrgizdi.

«Ádil istiń – arty ıgi» taqyrybynda jamaǵatqa juma ýaǵyzyn aıtqan QMDB tóraǵasy ádil bolýdyń, ádilet jolyn ustanýdyń mańyzyna toqtaldy.

«Adamdarǵa kórkem ónege retinde jiberilgen súıikti Paıǵambarymyzdyń (oǵan Allanyń salaýaty men sálemi bolsyn) boıyndaǵy asyl qasıetterdiń biri – osy ádildik edi. Qasıetti Qurandaǵy «Shýra» súresiniń 15-aıatynda Alla Taǵala ardaqty Paıǵambarymyzǵa (oǵan Allanyń salaýaty men sálemi bolsyn): «(Olarǵa) «Alla túsirgen Kitapqa ıman keltirdim. Sondaı-aq aralaryńda ádildik etýge buıyryldym»dep aıt», – dep ámir etken.

Bizdiń ata-babalarymyz da ádildik uǵymyn erekshe qaster tutqan.«Qasym hannyń qasqa joly», «Esim hannyń eski joly», «Áz Táýkeniń Jeti Jarǵysy» – bári de qara qyldy qaq jarǵan ádilettilikke negizdeldi.
Abaı Qunanbaı uly babamyz óleń joldarynda:
Mahabbatpen jaratqan adamzatty,
Sen de súı, ol Allany jannan tátti.
Adamzattyń bárin súı baýyrym dep,
Jáne haq joly osy dep ádiletti – dep ádiletti súıýge shaqyrǵan. «Kimde-kimniń ádileti joq bolsa, onyń uıaty joq», – dep danyshpan babamyz otyz segizinshi qara sózinde aıtqan bolatyn» dedi Bas múftı.

Naýryzbaı qajy Taǵanuly juma namazyn júrgizip, jamaǵatty otbasynda da, qoǵamda da ádil bolýǵa shaqyryp, elimiz ben jerimizdiń tynyshtyǵyn tilep, jamaǵatpen birge duǵa jasady.