QMDB tóraǵasyna ýnıversıtettiń jumysyn baıandady (FOTO)
Almaty qalasyna resmı saparmen kelgen Bas múftı Naýryzbaı qajy Taǵanuly bastaǵan delegatsııa «Nur Múbárak» ýnıversıtetiniń ustazdarymen kezdesti.
Kezdesýge ýnıversıtet rektory, professor Mýhammad ásh-Shahhat ál-Jındı, prorektor, dotsent Qaırat Qurmanbaev, QMDB Apparat basshysy Ǵylymbek Májıev, Dinı bilim jáne kadr daıarlaý bóliminiń meńgerýshisi Beıbit Myrzageldıev, «Zeket» qorynyń dırektory Talǵat Omarov, Almaty qalasynyń ımamy Erkinbek Shoqaı men oqý ordasynyń ustazdary qatysty.
Basqosýda prorektor Qaırat Qurmanbaev ýnıversıtettiń oqý baǵdarlamasy boıynsha jańa ózgerister men ujymnyń bastamalary týraly Bas múftıge baıandap berdi.
Ýnıversıtettiń jumys esebin tyńdaǵan QMDB Tóraǵasy Naýryzbaı qajy Taǵanuly:
«Ózderińiz bilesizder, Dinı basqarma memlekettiń qamqorlyǵyn sezinip keledi. Osy oqý ornyna memlekettik oqý granttarynyń bólinýi úlken janashyrlyq dep bilemin. Memleket basshysy Qasym-Jomart Toqaevpen, Tuńǵysh Prezıdent – Elbasy Nursultan Nazarbaevpen kezdesýimde memlekettiń qamqorlyǵyn aıtyp, aıryqsha alǵysymdy jetkizdim. «Nur Múbárak» dinı kadr daıarlaıtyn irgeli oqý ordamyz bolǵandyqtan, ýnıversıtettiń tynys-tirshiligi men jumysy meniń jiti nazarymda. 15 stýdentke QMDB tarapynan qosymsha oqý grantyn bóldik. Dinı basqarma «Nur Múbárak» ýnıversıtetiniń quryltaıshysy retinde árqashan qoldaý kórsetý sharalaryn júzege asyra bermek. Alla Taǵala asyl qyzmetterińizge jar bolsyn!» – dedi.
Kezdesý sońynda Bas múftı dinı kadr daıarlaý baǵytyndaǵy jumystardy jetildirý qajettigin atap ótti.
