QMDB JANYNDAǴY QARILAR ALQASYNYŃ KEZEKTI OTYRYSY ÓTTI

Búgin Astanada Qazaqstan musylmandary dinı basqarmasynyń uıymdastyrýymen Astana qalasynda Qarılar alqasynyń kezekti otyrysy ótti.

Jıyn Quran oqýmen bastalyp, kún tártibine sáıkes ózekti máseleler qaraldy. Basqosý barysynda QMDB Tóraǵasy, Bas múftı Naýryzbaı qajy Taǵanuly zamanaýı qoǵamda Quran ilimin nasıhattaýdyń strategııalyq mańyzyn atap ótti.

«Qazirgi qoǵam – aqparat aǵyny jyldam, qundylyqtar almasyp jatqan kezeń. Osyndaı ýaqytta Quran ilimi rýhanı baǵdarymyzdyń temirqazyǵy bolýy tıis. Biz jastarymyzdy túrli aǵymdardan, teris ıdeologııalardan qorǵaýdyń eń tıimdi joly - olarǵa Qurandy durys úıretý, onyń maǵynasyn sanasyna sińirý. Qurandy tek jattap qana qoımaı, onyń mánin túsinip, ómirde qoldana biletin býyn qalyptastyrý – bizdiń basty maqsatymyz.

Osy rette qarılar daıyndaý ortalyqtarynyń róli erekshe. Bul ortalyqtar Qurandy jatqa biletin qarılardy ǵana emes, ony júregimen sezinetin, qoǵamǵa jetkize alatyn tulǵalardy tárbıeleýi tıis. Sondyqtan bizge bul baǵyttaǵy jumysty jańa deńgeıge kóterý qajet»,-dedi Bas múftı.

Sonymen qatar, Dinı bilim jáne kadr daıyndaý bóliminiń meńgerýshisi Hasan Amanqulov Quran jattaý ortalyqtarynyń jańa jarǵysyn tanystyryp, ádistemelik erejeni bekitý máselesin usyndy.

Quran sektorynyń meńgerýshisi Serik Ahmet Serik Ramazan aıynyń qorytyndysy men baıqaýlardy uıymdastyrý tártibimen tanystyrsa Temirjan Muratov qarılardy daıarlaý isiniń qazirgi jaǵdaıy men bolashaǵyna toqtalyp, saladaǵy ózekti baǵyttardy atap ótti.

Jıyn sońynda qatysýshylar erkin pikir almasyp, birqatar usynystaryn bildirdi.
















​