QMDB: JYLDY QORYTYNDYLAÝǴA ARNALǴAN TÓRALQA MÁJILISI BASTALDY (FOTO)

Elordada Qazaqstan musylmandary dinı basqarmasynyń tóraǵasy, Bas múftı Naýryzbaı qajy Taǵanulynyń jetekshiligimen 2024 jyldy qorytyndylaýǵa arnalǵan Tóralqa májilisi bastaldy.

Jıyn qasıetti Quran Kárim aıattaryn oqýmen bastalyp, Bas múftı el amandyǵy men tynyshtyǵy úshin duǵa tiledi. Budan keıin QMDB Tóraǵasy elimizdiń ár óńirinen kelip otyrǵan ókildikterdiń bas ımamdarynyń, sondaı-aq din qyzmetkerleriniń jyl boıyna atqarǵan jumysyna oń baǵa berip, sáttilik tiledi.

«Qazaqta «Kemedeginiń jany bir» degen danalyq sóz bar. Biz bárimiz bir kemede ketip bara jatqan, ıaǵnı bir maqsat aıasynda qyzmet etip jatqan jandarmyz. Dese de ár adam óziniń ıgi amaly úshin tıisti saýabyn alady.

Birde hazireti Álı (oǵan Alla razy bolsyn): «Men árbir jasaǵan jaqsylyǵymdy ózime jasadym», - deı kele, myna aıatty oqıdy: «Áldekim izgi is istese, sonda ózi úshin. Al kim jamandyq istese, ol da ózine. Sosyn Rabbylaryńa qaıtarylasyńdar» («Jásııa» súresi, 15-aıat).

Allaǵa shúkir, jyl basynda ózderińizge joldaǵan baǵdarlyq baıandamamda berilgen tapsyrmalar oıdaǵydaı oryndaldy. Josparymyzdyń oıdaǵydaı oryndalýyna úles qosqan árqaısyńyzǵa alǵysymdy jetkizemin. Alla razy bolsyn!» dedi Bas múftı.

Aıta keteıik, búgin jáne erteń Dinı basqarmanyń elimizdiń ár óńirindegi ókildikteriniń bas ımamdary 2024 jyly atqarǵan jumys esebin baıandaıdy.

​