Qoǵammen baılanys bóliminiń meńgerýshisi taǵaıyndaldy (FOTO)

Bas múftı Naýryzbaı qajy Taǵanulynyń buıryǵymen Qazaqstan musylmandary dinı basqarmasy janynan Qoǵammen baılanys bólimi ashylyp, bólim meńgerýshisi qyzmetine Nurbek Esmaǵanbet taǵaıyndaldy.

Elordada ótken kezekti Apparat jınalysynda QMDB Tóraǵasy Naýryzbaı qajy Taǵanuly Nurbek Áýeshanulynyń dinı saladaǵy biliktiligi men tájirıbesin tilge tıek ete kele, bul sheshim Dinı basqarmanyń qoǵammen baılanys baǵyty boıynsha jumystaryna oń yqpal etetinin atap ótti.

«Ózderińizge belgili, qazir Dinı basqarma qoǵammen baılanys baǵyty boıynsha jumystarǵa basymdyq berip keledi. Allaǵa shúkir, Dinı basqarma janynan Aqsaqaldar, Jastar, Sarapshylar keńesi qurylyp, jaqsy jumys nátıjelerine qol jetkizip kelemiz. Endigi maqsat – osy sala boıynsha is-sharalardy sapaly túrde uıymdastyrý. Osy maqsatta arnaıy Qoǵammen baılanys bólimin ashýǵa sheshim qabyldadym», – dedi Naýryzbaı qajy Taǵanuly.

Aıta ketsek, Nurbek Áýeshanuly buǵan deıin Aqparat jáne qoǵammen baılanys bólimi meńgerýshisiniń orynbasary qyzmetin atqarǵan bolatyn.