Qos senator múftııattyń úndeýine qoldaý bildirdi (FOTO)

Parlament Senatynyń depýtattary – Asqar Beısenbaev pen Álı Bektaev Qazaqstan musylmandary dinı basqarmasynyń Astanadaǵy Bas keńsesinde boldy.

Depýtattar Bas múftı Serikbaı qajy Orazben kezdesip, búgingi urpaq tárbıesi, otbasyndaǵy ananyń róli, jastardyń ar-namysyn oıatý, janaza, qudaıy as rásimderinde ysyrapqa jol bermeý, ımamdardy áleýmettik qoldaý, jas mamandardy oqytý, t.b. máseleler tóńireginde pikir alysty.

Óz kezeginde sóz alǵan Asqar Beısenbaev pen Álı Bektaev ysyrapqa jol bermeý týraly múftııattyń úndeýin qoldaıtynyn jetkizdi.

«Múftııattyń janazada, qudaıy astarda ysyrapshyldyqqa jol bermeý týraly halyqqa úndeýi quptarlyq bastama. Bul bastamany halyq jaqsy qabyldap, keıbir óńirlerde osy másele oń sheshimin tabýda. Aımaqqa jasaǵan saparymda buǵan kózim jetti. Óıtkeni, jaǵdaıy joq adam qaryzǵa batyp, qınalyp jatatynyn jaqsy bilemiz», – deıdi Asqar Asanuly.

Basqosýda pikir bildirgen Álı Ábdikárimuly:

«Bizdiń qoǵamdaǵy kóńil kónshitpeıtin máseleniń biri – topyraqty ólimde jarysý. Bul – jaǵdaıy bar adamnyń malyn shashyp, turmysy tómen otbasyn qaryzǵa batyryp jatqan jaǵymsyz úrdis. Osy máseleni der kezinde qolǵa alyp jatqandaryńyz óte durys», – dep atap ótti. 

Kezdesý sońynda Bas múftı mártebeli meımandarǵa «Uly dala tósindegi Islam» kitabyn syıǵa tartty.