«QURAN ÁLIPPESI» VIDEO SABAQTARY BASTALDY

Búgin, qasıetti juma kúni respýblıkalyq «Áziret Sultan» meshitinde jańa jobanyń tusaýy kesildi. Karantın rejımine sáıkes qazirgi tańda onlaın kórsetilimder men vıdeo sabaqtardyń mańyzy aıryqsha bolyp turǵany belgili. Osyǵan oraı, respýblıkalyq «Áziret Sultan» meshitiniń resmı portaly Muslim.kz saıtynda «Quran álippesi» vıdeo sabaqtary bastalyp otyr.

Júıeli túrde júrgiziletin vıdeo sabaqtar ár apta saıyn shyǵyp otyratyn bolmaq. Elimizge belgili qarı, «Áziret Sultan» meshitiniń azanshysy Erlan Bazarbaıuly jeńildetilgen ádis-tásilder boıynsha qysqa merzim ishinde arab álipbıin úıretip, qasıetti Quran kárimdi tupnusqadan oqıtyn deńgeıge jetkizedi.

Ardaqty Paıǵambarymyz (s.ǵ.s.) óziniń bir ósıetinde: «Senderdiń eń jaqsylaryń – Qurandy úırenip, ony ózgege úıretkenderiń», – degen eken. Qurmetti oqyrman! Árbir árpi saýapqa tunǵan qasıetti Quran kárimdi úırenýge taptyrmas múmkindikten qur qalmańyzdar!

Vıdeo sabaqtardy tez meńgerip, qosymsha bilim jetildirý maqsatynda «Quran álipppesi» kitabynyń PDF nusqasyn myna silteme arqyly kóshirip alýǵa bolady.