QURBAN-2024 QORYTYNDYSY: QMDB 136 964 JANUIaǴA QURBANDYQ ETIN ÚLESTIRDI
QMDB Tóraǵasy, Bas múftı Naýryzbaı qajy Taǵanulynyń bastamasymen respýblıka kóleminde «Qurban-2024» qaıyrymdylyq aktsııasy joǵary deńgeıde uıymdastyryldy.
Osy jyldyń 16-18 maýsym aralyǵynda ótken musylmandardyń ulyq merekesi – Qurban aıt kúnderi Qurban2024.kz saıtyna tapsyrys berý arqyly onlaın jáne jergilikti qasaphanalarda oflaın formatta qurban shalyndy. Merekege oraı arnaıy qurylǵan jumys shtaby qurban shalý rásimderin respýblıka kóleminde uıymdastyrýdy qolǵa alyp, búginde júıeli jumysyn sátti aıaqtap otyr.
Qoryta aıtsaq, elimiz boıynsha Qurban aıt kúnderi Qurban2024.kz saıtyna 2 142 tapsyrys berildi. Respýblıka boıynsha 1388 adamnan quralǵan birneshe shtab qurylyp, 81 qasaphanada 418 qasapshy tapjylmaı jumys istedi.
Elimiz boıynsha qurban shalý rásimi barysynda jalpy sany 40 778 mal soıylsa, onyń 35 929-y – qoı, 2 539-y – eshki, 2 290-y – iri qara, al túıe sany – 20. Osylaısha 131 et qabyldaý pýnktterine jınalǵan qurbandyq eti 136 964 otbasyǵa din qyzmetkerleri jáne eriktilerdiń kómegimen jetkizilip berildi. Qurbandyq eti 358 mekemege, atap aıtqanda, múgedekter qory, zaǵıptar qory, aýrýhanalar men ardagerler úıine berildi.
Osy oraıda Qazaqstan musylmandary dinı basqarmasy barsha din qyzmetkerlerine, ımamdarǵa, qurban shalýdy onlaın jáne oflaın formatta júzege asyrýǵa járdemdesken jergilikti ákimdik ókilderine, saýapty iske atsalysqan barsha aqjúrek azamattarǵa, jany jomart kásipkerler men eriktilerge aıryqsha alǵysyn bildiredi. Alla mol saýaptan jazsyn!
