QURBAN AIT QUTTY BOLSYN!
Asa qamqor erekshe meıirimdi Allanyń atymen bastaımyn! Barlyq maqtaý Allaǵa tán. Ardaqty Paıǵambarymyz Muhammedke Allanyń salaýaty men sálemi bolsyn!
Qadirli otandastar!
Sizderdi musylman qaýymynyń ulyq meıramy – Qurban aıt merekesimen shyn júrekten quttyqtaımyn. Aıt qabyl bolsyn! Barshańyzǵa myqty densaýlyq, otbasylaryńyzǵa amandyq, jumystaryńyzǵa bereke tileımin. Alla Taǵala bárimizdiń mereıimizdi ústem etsin!
Qurban aıt – shynaıy nıet pen Allaǵa degen súıispenshilikti pash etetin meıram. Ulyq merekeniń tárbıelik máni men maǵynasy tereńde jatyr. Qasıetti Quranda: «Umytpańdar, olardyń eti de, qany da eshqashan Allaǵa jetpeıdi. Oǵan jetetin nárse – júrekterińizge uıalaǵan taqýalyqtaryń (shynaıy nıetteriń)» («Haj» súresi, 37-aıat), – delingen. Aıatta aıtylǵandaı, Qudaı jolynda jaqsylyq jasaýǵa nıettengen pende bul amaldy rııasyz oımen oryndaıdy.
Adam balasy qurbandyq shalý arqyly Allanyń bergen rızyq-nesibesine shúkir etedi. Qudaıdyń násip etken nyǵmettiń bir bóligin kómekke muqtaj jandarǵa úlestirip, olardyń da aqysyn berip, qýanyshqa bóleıdi. Óıtkeni, Paıǵambarymyz Muhammed (oǵan Allanyń salaýaty men sálemi bolsyn): «Paryz amaldan keıingi Allaǵa unamdy is – musylmannyń júregine qýanysh syılaý» degen.
Halqymyz «Bota alǵansha bata al» deıdi. Úlkenniń, jalpy kómekke muqtaj jandardyń alǵysyn alyp, batasyna bólený – aıt kezinde oryndalatyn saýapty istiń biri. Musylman balasynyń ulyq kúnde shynaıy nıetpen qurban shalyp, ony múgedekter men jetimderge, kópbalaly otbasylar men qarttarǵa taratyp, alǵysyn alýǵa tyrysatyny sondyqtan.
Osy rette elimizdegi barsha kásipker azamattardy Qurban aıttyń qurmetine mal qunyn qoldan kótermeı, halyqtyń áleýmettik jaǵdaıyn eskerip, ońtaıly baǵa usynýǵa, jurtymyz kúnde tutynatyn azyq-túlikke múmkindiginshe jeńildik jasaýǵa shaqyramyn. Qurban aıtty atap ótýdiń negizgi maqsaty – musylmandar arasynda ózara meıirimdilik, jomarttyq, qaıyrymdylyq, qanaǵat syndy adamgershilik qundylyqtardy qalyptastyrý. Allanyń raqym nury tógiletin berekeli sátterde halqymyzǵa jaqsylyq jasap, kópshiliktiń rızashylyǵyna bóleneıik.
Ardaqty aǵaıyn!
Alla qalasa bıyl elimizde qurban shalý rásimi oflaın jáne onlaın formatta ótedi. Dinı basqarma el azamattaryna, ásirese qala turǵyndaryna qolaıly jaǵdaı jasaý maqsatynda qurban shalý rásimin qashyqtan ótkizýge arnalǵan qurban2023.kz saıtyn iske qosty. Barsha musylman qaýymyn múftııattyń «Rabbyń úshin qurban shal» qaıyrymdylyq aktsııasyna úles qosyp, saýapty isterde belsendi bolýǵa úndeımin.
Búginde álem musylmandary Mekke qalasynda qajylyq jasaýda. Solardyń qatarynda paryzyn ótep júrgen 4 myń otandasymyzdyń nıeti men duǵasy qabyl bolyp, elimizge aman-esen oralýyn tileımiz.
Alla Taǵala elimiz ben jerimizge berekesin jaýdyryp, shalǵan qurbandyqtarymyzdy, bergen sadaqalarymyzdy, aıt kúnderi amalǵa asyrǵan Allaǵa unamdy árbir ıgi isterimizdi qabyl etkeı. Ámın!
Naýryzbaı qajy TAǴANULY,
Qazaqstan musylmandary dinı
basqarmasynyń tóraǵasy, Bas múftı
